ކުރީގެ ތިން ރައީސުން މިރޭ ބޭއްވެވި ޚާއްޞަ ބައްދަލުވުމަކަށްފަހު، ރާއްޖޭގެ ސިޔާސީ މަސްރަހު ހޫނުވެ، އެކި ފަރާތްތަކުން ޚިޔާލުފާޅުކުރަން ފަށައިފިއެވެ.
މި ބައްދަލުވުމާ ގުޅޭގޮތުން ކުރީގެ ނައިބު ރައީސް އަޙުމަދު އަދީބު ވިދާޅުވީ، ރޭ ބޭއްވުނު ތިން ރައީސުންގެ ބައްދަލުވުމަށްފަހު އެ ބޭފުޅުންނާ ބެހޭގޮތުން ދައްކާނެ ވަރަށް ގިނަ ވާހަކަތައް އެބަހުރި ކަމަށެވެ. އަދީބު މިހެން ވިދާޅުވެފައިވަނީ މި ބައްދަލުވުމުގެ ސަބަބުން ސިޔާސީ ގޮތުން އަތުވެދާނެ ބަދަލުތަކަށް އިޝާރާތް ކުރައްވަމުންނެވެ.
މިރޭގެ 3 ރައީސުންގެ ބައްދަލުވުމަށް ފަހު އަޅުގަނޑުވެސް މި ރައީސުންނާއި ބެހޭގޮތުން ދައްކާލަން ލައްކަ ގިނަ ވާހަކަ އެބަހުރި !!! pic.twitter.com/vE7mYBer3g
— Ahmed Adeeb (@Ahmed_Adeeb) May 15, 2026
މި ބައްދަލުވުމުގެ އެންމެ ފާހަގަކޮށްލެވޭ އެއް ކަމަކީ، ކުރީގެ ރައީސް މުޙައްމަދު ނަޝީދާއި ކުރީގެ ރައީސް އިބްރާހީމް މުޙައްމަދު ޞާލިޙު ކުރީގެ ރައީސް ޔާމީނާއި ސިޔާސީ ގޮތުން ގުޅިވަޑައިގެން މަސައްކަތް ކުރެއްވުމަށް ނިންމެވި ނިންމެވުމެވެ. މި ތިން ރައީސުން ބަޔާންކުރައްވާ ގޮތުގައި، މި އިއްތިހާދުގެ މައިގަނޑު މަޤްޞަދަކީ މިހާރުގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރު ޖަވާބުދާރީ ކުރުވުމާއި، ނޫސްވެރިންގެ ޙައްޤުތައް ހިމާޔަތް ކުރުމެވެ.
ނަމަވެސް، މި ހަރަކާތަށް ސަރުކާރު ހިންގާ ކޯލިޝަނުގެ ލީޑަޝިޕުން ވަނީ ވަރަށް ބޮޑަށް ފާޑުކިޔާފައެވެ. ސަރުކާރު ހިންގާ ޕާޓީގެ އިސް ބޭފުޅުން ސިފަކުރައްވާ ގޮތުގައި، މިއީ ގައުމީ މަސްލަހަތަށްވުރެ ބޮޑަށް އަމިއްލަ ސިޔާސީ މަންފާ ހާސިލުކުރުމަށްޓަކައި އުފައްދާފައިވާ ”ސިޔާސީ އިއްތިހާދެކެވެ.“ އަދި މިއީ ސަރުކާރުގެ މަސައްކަތްތަކަށް ހުރަސްއެޅުމަށް ކުރެވޭ ކަމެއްގެ ގޮތުގައިވެސް ސަރުކާރަށް ތާއީދުކުރާ ފަރާތްތަކުން ތުހުމަތު ކުރެއެވެ.
މި ބައްދަލުވުމަކީ ރާއްޖޭގެ ސިޔާސީ އޮއިވަރަށް ބޮޑެތި ބަދަލުތަކެއް އަތުވެދާނެ ކަމެއްގެ ގޮތުގައި މަސްރަހު ދިރާސާކުރާ ފަރާތްތަކުން ދެކެއެވެ. މިކަމާ ގުޅިގެން ސަރުކާރުގެ އިސް ބޭފުޅުންނާއި މަޖިލީހުގެ ރައީސް އަބްދުއްރަހީމް އަބްދުﷲ ވެސް ވަނީ ފާޑުވިދާޅުވެފައެވެ.
