މިއަހަރުގެ ބަރަކާތްތެރި ޙައްޖުގެ މަތިވެރި އަޅުކަން އަދާކުރުމަށްޓަކައި ދިވެހި ޙައްޖުވެރިންގެ ފުރަތަމަ ގުރޫޕް މިއަދު ސައުދީ އަރަބިއްޔާއަށް ފުރައިފިއެވެ.
މިއަދު ހަވީރު 15:25 ގައި ސައުދީ އެއާލައިނުގެ ފްލައިޓެއްގައި ފުރި މި ގުރޫޕުގައި ޖުމްލަ 235 ޙައްޖުވެރިން ހިމެނެއެވެ. ޙައްޖުވެރިން ފުރުމަށްޓަކައި މިއަދު ހެނދުނުން ފެށިގެން ޚާއްސަ ބަސްތަކުގައި އެއަރޕޯޓަށް ދިއުމުގެ މަސައްކަތް ވަނީ ކުރިއަށް ގެންގޮސްފައެވެ.
ޙައްޖުވެރިން ފުރަން ފަށާފައިވާއިރު، ކުރިއަށް އޮތް އާދިއްތަ، ހޯމަ އަދި އަންގާރަ ދުވަހުވެސް އިތުރު ޙައްޖުވެރިން ފުރުމަށް ވަނީ ހަމަޖެހިފައެވެ.
މި ދަތުރުތަކާ ގުޅިގެން މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) އާއި އިސްލާމިކް މިނިސްޓްރީގެ އިތުރުން މޯލްޑިވްސް ޙައްޖު ކޯޕަރޭޝަން ގުޅިގެން ވަނީ ވެލާނާ އިންޓަރނޭޝަނަލް އެއަރޕޯޓުގައި ޚާއްސަ އިންތިޒާމުތަކެއް ހަމަޖައްސާފައެވެ. އެގޮތުން ޙައްޖުވެރިން ގޮވައިގެން އަންނަ ބަސްތައް މަޑުކުރުމަށް ވަކި ސަރަހައްދުތަކެއް ކަނޑައަޅައި، ޙައްޖާޖީންނަށް ލުއިފަސޭހަކަމާއެކު ފުރޭނެ އިންތިޒާމުތައް ވަނީ ފުރިހަމަކޮށްފައެވެ.
މިނިސްޓްރީ އޮފް އިސްލާމިކް އެފެއާޒްއިން މައުލޫމާތު ދެއްވި ގޮތުގައި، ދިވެހި ޙައްޖުވެރިން މައްކާއަށް ދިއުމުގެ ކުރިން އެ ތަނުގައި ފުރިހަމަ ކުރަންޖެހޭ ހުރިހާ އިންތިޒާމުތަކެއް މިހާރު ވަނީ ޙައްޖު ކޯޕަރޭޝަނުން ފުރިހަމަކޮށްފައެވެ. މީގެ ތެރޭގައި ޙައްޖުވެރިން ތިބޭނެ ހޮޓަލުގެ އިންތިޒާމުތަކާއި، އެތެރޭގެ ދަތުރުފަތުރާއި، މިނާ އަދި ޢަރަފާތުގައި ފުރިހަމަ ކުރަންޖެހޭ އެންމެހާ ކަންކަން ހިމެނެއެވެ. ސައުދީ އަރަބިއްޔާގައި ހުންނަ ރާއްޖޭގެ ޙައްޖު މިޝަނުން މި ކަންކަން ވަރަށް ގާތުން ބަލަމުންދާނެ ކަމަށްވެސް އެ މިނިސްޓްރީން ބުނެއެވެ.
މިއަހަރުވެސް ރާއްޖެއަށް ލިބިފައިވަނީ ޖުމްލަ 1,000 ޙައްޖު ކޯޓާއެވެ. މީގެ ކުރީ އަހަރުތަކާ ޚިލާފަށް، މިއަހަރު ހުރިހާ ކޯޓާއެއްގެ އިންތިޒާމުތައް ބަލަހައްޓަނީ ސަރުކާރުގެ ޙައްޖު ކުންފުނި، މޯލްޑިވްސް ޙައްޖު ކޯޕަރޭޝަނުންނެވެ. އަދި މިއަހަރުގެ ޙައްޖުވެރިންވެސް ދަތުރުކުރަނީ ”މައްކާ ރޫޓު އިނީޝިއޭޓިވް“ ގެ ދަށުން، ލުއިފަސޭހަ އިންތިޒާމުތަކަކާއެކުގައެވެ“
