ކުރީގެ ރައީސް ޢަބްދުﷲ ޔާމީންގެ ވެރިކަމުގައި މުޅި ރާއްޖެއަށް ތަރައްގީ ގެނެސްދެއްވި ކަމަށާއި ނަމަވެސް، އެ ދުވަސްވަރު ގައުމުގައި އޮތީ ކޮރަޕްޝަނާއި އަނިޔާވެރިކަން ކަމަށް ވިދާޅުވެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ޔާމީނަށް ހޫނު ރައްދެއް ދެއްވައިފިއެވެ.
ވެރިކަން ކުރާ ޕާޓީ ޕީއެންސީން ރޭ ކުރިއަށްގެންދިޔަ ހަރުގެ ޖަލްސާގައި ވާހަކަދައްކަވަމުން ރައީސް ވިދާޅުވީ، މާޒީގައި ވެގެންދިޔަ ކަންކަމަކީ ނުވާ ކަމަކަށް ނުވާނެ ކަމަށާއި ކުޑަކުޑަކޮށް މާޒީގެ ސަފުހާތައް ނިއުޅުވާލާއިރު ވެރިކަން ކުރައްވާފައިވާ ބޭފުޅުންގެ ހަގީގަތް ފެންނަން އެބަހުރި ކަމަށެވެ. އަދި މީގެ ކުރިން މީހަކު ކިރިޔާ ވެސް އެއްޗެއް ބުނާއިރަށް ޖަލަށްލީ ދުވަސް ވެސް މާޒީވެ ގޮސްފި ކަމަށް އެމަނިކުފާނު ވިދާޅުވިއެވެ.
”ތަރައްގީގެ މަޝްރޫއުތައް ވަރަށް ގިނައިން ހިންގި. އަޅުގަނޑު މިއީ އޭގެ އެންމެ ބޮޑު ޒިންމާއެއް ހަވާލުކޮށްފައި ހުރި އެކަކު. ދެން މިތާ އެބަތިބި ބައެއް ވަޒީރުން އެ ޒިންމާގައި ބައިވަރު އިހުލާސްތެރި މަސައްކަތްކުރެއްވި. އެކަމަކު ތަރައްގީ ކުރިއަސް ގައުމުގައި އޮތީ ކޮރަޕްޝަނާއި އަނިޔާވެރިކަން. ސިޔާސީ ހުރިހާ އެންމެން ޖަލުގައި. އެއީ ގައުމު ވެސް ފެންނަން ހުރި ހަގީގަތް. އެހެންވީމާ ޓްރެކް ރެކޯޑު މިއޮތީ ވަރަށް ސާފުކޮށް ޑިސްޕްލޭވެފައި،“ ރައީސް ވިދާޅުވިއެވެ.
އަދިހަމައެހެންމެ، ޔާމީންގެ ވެރިކަމުގައި ކޮރަޕްޝަން އޮތް މިންވަރަށް އަލިއަޅުއްވާލައްވަމުން ރައީސް ވިދާޅުވީ، އޭރު އެންމެ ބޮޑު ކޮރަޕްޝަންގެ އަމަލަކަށް އޮތީ އެމްއެމްޕީއާރުސީގެ ވައްކަމުގެ މައްސަލަ ކަމަށާއި ނަމަވެސް، މިދިޔަ އެމްޑީޕީ ސަރުކާރަށް އެ މައްސަލަ ނުބެލުނު ކަމަށެވެ. ކޮރަޕްޝަން ނައްތާލާނާމޭ ބުނަމުންދިޔަ ނަމަވެސް، އެމްއެމްޕީއާރުސީގެ ވައްކަމުގައި އެންމެ އިސްކޮށް ތިބި މީހުން މިދިޔަ ސަރުކާރުން ދޫކޮށްލީ ކަމަށް އެމަނިކުފާނު ވަނީ ވިދާޅުވެފައެވެ.
ނަމަވެސް މި ސަރުކާރުން މަސައްކަތް ކުރައްވާނީ ކޮރަޕްޝަނާ ދެކޮޅަށް ކަމަށާއި، މި މަސައްކަތުގައި ސަރުކާރު އޮތީ ވަރަށް އެކުވެރިކަމާއެކު، ވަރަށް ބަދަހިކަމާއެކު ކަމަށް ރައީސް ވިދާޅުވިއެވެ. އެމަނިކުފާނު ވަނީ، ކޮރަޕްޝަންގެ އަމަލު ހިންގަން ހިތަށް އަރާ ބޭފުޅަކު ހުންނެވިނަމަ ގާތުގައި ބަަސްކިޔަން ނުހުރެ ދުރަށްޖެހުމަށް ވެސް އެދިވަޑައިގެންފައެވެ.
