އަބުރު ކަތިލުމަށްޓަކައި ދޮގު މައުލޫމާތު ހިމަނައިގެން ޑޮކިއުމަންޓްރީތައް ނެރުނު ނަމަވެސް އެކަމުގެ ސަބަބުން ދުނިޔެ އާއި އާހިރަތުގައި ހުރިހާ ގޮތަކުން ވެސް ފައިދާކުރާނީ އެމަނިކުފާނަށް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މުޢިއްޒު މި މޭރުމުން ވިދާޅުވީ، ސަރުކާރު ހިންގާ މައި ޕާޓީ ޕީއެންސީން ރޭ ކުރިއަށް ގެންދިޔަ ހަރުގެ ޖަލްސާގައި ވާހަކަދައްކަވަމުންނެވެ. އެގޮތުން ދާދި ފަހުން ”އަދަދު“ ނޫހުން ނެރުނު ޑޮކިއުމަންޓްރީއަކާ ގުޅިގެން އިދިކޮޅުގެ ފަރާތްތަކަށް ރައްދުދެއްވަމުން އެމަނިކުފާނު ވިދާޅުވީ، އަގުވައްޓާލުމުގެ ގޮތުން ހަގީގަތާ ހިލާފު ދޮގު ވާހަކަތައް ފަތުރާތީ އެކަމާ އުފާކުރައްވާ ކަމަށެވެ.
މީހެއްގެ އަގު ވައްޓާލުމުގެ ގޮތުން ހަގީގަތާ ހިލާފު ދޮގު ވާހަކަތައް ފަތުރާއިރު ކެތްތެރިކަން އިސްކުރުމަކީ އިސްލާމްދީނުގައި ވަރަށް މަތިވެރި ސަވާބާއި ދަރުމަ ލިބޭނެ ކަމެއްކަން ފާހަގަކުރައްވަމުން ރައީސް ވިދާޅުވީ، އެފަދަ ކަންކަމުގެ ސަބަބުން ދުނިޔެ އާއި އާހިރަތުގައި ހުރިހާ ގޮތަކުން ވެސް ފައިދާކުރާނީ އެމަނިކުފާނަށް ކަމަށެވެ.
”އެހެންވީމަ އަޅުގަނޑު އެކަމާ އުފާކުރަން. އަޅުގަނޑު އެދެނީ ގިނަ ގިނައިން ޑޮކިއުމެންޓްރީ ހަދައިގެން ނެރެން. އަޅުގަނޑާ ބެހޭ ގޮތުން ތެދު ބަހުން ޑޮކިއުމެންޓްރީއެއް އަޅުގަނޑުގެ އަބުރު ކަތިލާކަށް ނުނެރެވޭނެ ޔަގީނުން ވެސް. ހުސް ދޮގު ހަދަން ޖެހޭނީ. ހުސް ދޮގު ހަދައިގެން ގިނައިން ނެރެންވީ. އަޅުގަނޑަށް އޭގައި އޮތީ ހުސް ފައިދާ. މި ދުނިޔޭގައި ވެސް އަދި އާހިރަތުގައި ވެސް އަޅުގަނޑަށް އެކަމުން އޮތީ ފައިދާ. ތިޔަބޭފުޅުން އަޅުގަނޑަށް އެހާ ގިނަ ސަވާބު ދެއްވަން ބޭނުން ނަމަ، ގިނަ ގިނައިން ޑޮކިއުމެންޓްރީ ހައްދަވާ. އަޅުގަނޑަށް އަޅުގަނޑަށް އޭގެން ހުރިހާ މޮޅެއް އޮތީ،“ – ރައީސް ވިދާޅުވިއެވެ.
މީގެ އިތުރުން ރައީސް ވަނީ ފަސްޓްލޭޑީ ސާޖިދާ މުޙައްމަދު އިނގިރޭސި ވިލާތަށް ކުރެއްވި ދަތުރާ ގުޅުވައިގެން އިދިކޮޅު ފަރާތްތަކުން ދައްކަމުން އަންނަ ވާހަކަތަކަށް ވެސް ހޫނު ރައްދެއް ދެއްވައިފައެވެ. އެގޮތުން ރައީސްގެ ދެމަފިރިކަނބަލުންގެ ކައިވެނި ރޫޅިއްޖެ ކަމަށް ބުނެ، އިދިކޮޅު ފަރާތްތަކުން އަންނަނީ ވާހަކަތައް ދައްކަމުންނެވެ.
އިދުކޮޅު ފަރާތްތަކުން ދައްކަމުން އަންނަ ވާހަކަތަކަށް ރައްދުދެއްވަމުން ރައީސް ވިދާޅުވީ، މެޑަމް ސާޖިދާ އިނގިރޭސިވިލާތަށް ވަޑައިގަތީ، ދަރިކަނބަލުންނާ ބައްދަލުކުރެއްވުމަށް ކަމަށާއި އެއީ މީގެ ދޮޅު މަހެއްހައި ދުވަސް ކުރިން ރޭވިފައިވާ ދަތުރެއް ކަމަށެވެ. ނަމަވެސް އިދިކޮޅު ފަރާތްތަކުން އެކަން ސިޔާސީ ކަމަކަށް ހަދަން މަސައްކަތްކުރާ ކަމަށް ރައީސް މުޢިއްްޒު ވަނީ އިތުރަށް ވިދާޅުވެފައެވެ.
