އިނގިރޭސިވިލާތުގެ އަސްކަރިއްޔާ ޒަމާނީ ކުރުމުގެ މަޝްރޫއުގެ ދަށުން، ރިމޯޓުން ކޮންޓްރޯލް ކުރެވޭ 72 ”RCH 155“ ހޮވިޓްޒަރ ބަޑި ގަތުމަށް 1.35 ބިލިއަން ޑޮލަރު ހޭދަކުރާނެކަން އެ ޤައުމުން ބުދަ ދުވަހު އިޢުލާންކޮށްފިއެވެ. މިއީ އުޅަނދެއްގައި ހަރުކޮށްފައިވާ އާޓިލަރީ ބަޑިއެކެވެ.
މިދިޔަ އަހަރުތަކުގައި އިނގިރޭސިވިލާތުން ބޭނުންކުރަމުންދިޔަ ”AS90“ މަރުކާގެ އާޓިލަރީ ސިސްޓަމްތައް ޔޫކްރޭނަށް ހަދިޔާކުރުމާ ގުޅިގެން، އެ ޤައުމުގެ އަސްކަރީ ޤާބިލުކަމަށް ވަނީ ހީނަރުކަމެއް އައިސްފައެވެ. ”RCH 155“ އުޅަނދުތަކަކީ އެ އުނިކަން ފޫބައްދައިދޭނެ ވަސީލަތްތަކެކެވެ. މި އުޅަނދުތައް އެންމެ ފުރަތަމަ ލިބެން ފަށާނެ ކަމަށް ބެލެވެނީ 2028 ވަނަ އަހަރުގައެވެ.
މި ބަޑިއަކީ 70 ކިލޯމީޓަރު ދުރުގައި ހުންނަ އަމާޒުތަކަށް ހަމަލާދިނުމުގެ ގާބިލުކަން ލިބިފައިވާ، އަދި ގަޑިއަކު 100 ކިލޯމީޓަރު ބާރުމިނުގައި ދަތުރުކުރާ އެއްޗެކެވެ. މި ބާރުމިނުގެ ސަބަބުން ދުޝްމަނުންނަށް މިއަށް ހަމަލާދިނުމަށް އުނދަގޫވާނެއެވެ.
