އެމްނެސްޓީ އިންޓަނޭޝަނަލް އިން ބުނެފައިވާ ގޮތުގައި ނައިޖީރިއާގެ ހުޅަނގު އުތުރުގައި އޮންނަ ކާރުބާރު ބޮޑު މާރުކޭޓަކަށް އެ ގައުމުގެ އަސްކަރިއްޔާއިން ދިން ވައިގެ ހަމަލާއެއްގައި މަދުވެގެން 100 އާންމުން ވަނީ މަރާލާފައެވެ.
އިންސާނީ ހައްގުތަކަށް މަސައްކަތްކުރާ މި ޖަމްއިއްޔާގެ ނައިޖީރިއާ އޮފީހުން ބުނި ގޮތުގައި މި ހަމަލާ އަމާޒުވީ އާދީއްތަ ދުވަހު ޒަމްފާރާ ސްޓޭޓްގެ ތުމްފާ މާރުކޭޓަށެވެ. އަދި މި ހާދިސާ ވަގުތުން ތަހުގީގު ކުރުމަށް އެ ޖަމާއަތުން ދަނީ ގޮވާލަމުންނެވެ.
”ކަމާބެހޭ ފަރާތްތަކުން މި ނުރައްކާތެރި ހަމަލާތައް ތަހުގީގުކޮށް، އާންމުންނަށް އަމާޒުކޮށް ދޭ ފަރުވާކުޑަ ހަމަލާތައް ހުއްޓާލަންޖެހޭ،“ އެކްސް ގައި ކޮށްފައިވާ ޕޯސްޓެއްގައި އެމްނެސްޓީން ބުނެފައިވެއެވެ.
މިއީ ގާތްގަނޑަކަށް އެއް މަސް ދުވަހުގެ ތެރޭގައި ނައިޖީރިއާގެ އުތުރުގެ މާރުކޭޓަކަށް ދެވުނު މިފަދަ ބޮޑު ދެވަނަ ހަމަލާއެވެ. މިދިޔަ އެޕްރީލް މަހު ޖިއްލީގެ މާރުކޭޓަކަށް އަސްކަރިއްޔާއިން ދިން ވައިގެ ހަމަލާއެއްގައި ގާތްގަނޑަކަށް 200 މީހުން މަރުވި ކަމަށް މަސްދަރުތަކުން ރިޕޯޓުކޮށްފައި ވެއެވެ.
