ޔުނައިޓެޑް ޢަރަބް އެމިރޭޓްސް (ޔޫއޭއީ) ގެ އިރުމަތީ އައްސޭރިފަށުގައި ބަނދަރުކޮށްފައި އޮތް ބޯޓެއް ހިފަހައްޓައި، އީރާނުގެ ކަނޑުގެ ސަރަހައްދާ ދިމާލަށް މިސްރާބު ޖަހާފައިވާ ކަމަށް އިނގިރޭސިވިލާތުގެ އަސްކަރިއްޔާއިން މިއަދު ބުނެފިއެވެ.
ޔުނައިޓެޑް ކިންގްޑަމް މެރިޓައިމް ޓްރޭޑް އޮޕަރޭޝަންސް ސެންޓަރުން ބުނި ގޮތުގައި، ޔޫއޭއީގެ ފުޖައިރާ ބަނދަރާ 38 ނޯޓިކަލް މޭލު އިރުއުތުރުން، ހޮރްމޫޒް ކަނޑުއޮޅި ކައިރީގައި ބަނދަރުކޮށްފައި އޮތް މި އުޅަނދަށް ހުއްދަނެތް ބަޔަކު އަރައި، އެ ބޯޓު އެމީހުންގެ ބާރުގެ ދަށަށް ގެންގޮސްފައިވާ ކަމުގެ ރިޕޯޓުތައް ވަނީ ލިބިފައެވެ.
މި ބޯޓު ހިފަހައްޓާފައި މިވަނީ، އެމެރިކާގެ ރައީސް ޑޮނާލްޑު ޓުރަމްޕު ޗައިނާގެ ލީޑަރު ޝީ ޖިންޕިންއާ ބައްދަލުކުރުމަށް ބެއިޖިންގް އަށް ކޮށްފައިވާ މުހިއްމު ދަތުރުގެ ތެރެއިންނެވެ. މި ދެ ލީޑަރުންގެ މަޝްވަރާތައް ބޮޑަށް ބިނާވާނީ އީރާނާ އެކު ކުރެވެމުންދާ ހަނގުރާމައަށް ކަމަށް ބެލެވެއެވެ. މި ހަނގުރާމައިގެ ސަބަބުން ތެލާއި ގޭސް އަދި އެހެނިހެން މުދަލުގެ ވިޔަފާރިއަށް ބޮޑެތި ހުރަސްތަކެއް އެޅި، ދުނިޔޭގެ އިޤްތިޞާދަށް ވަނީ ލޮޅުން އަރާފައެވެ.
މި ހާދިސާ ހިނގާފައިވަނީ، އިޒްރޭލާއި އެމެރިކާއިން އީރާނާ ދެކޮޅަށް ކުރަމުންދާ ހަނގުރާމައިގެ ތެރޭގައި، އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ސިއްރިއްޔާތުގައި ޔޫއޭއީއަށް ޒިޔާރަތް ކުރިކަމަށް ކަމަށް އިޒްރޭލުން ބުނިތާ މަދު ގަޑިއިރުތަކެއް ފަހުންނެވެ. ނަމަވެސް، ޔޫއޭއީ އިން ވަނީ އެފަދަ އެއްވެސް ސިއްރު ޒިޔާރަތެއް ހިނގާފައި ނުވާކަމަށް ބުނެ އެކަން ވަގުތުން ދޮގުކޮށްފައެވެ.
