އިސްލާމިކް މިނިސްޓްރީން ޙައްޖުވެރިންނަަށް ހާއްސަކޮށްގެން ޙައްޖާއި ގުޅޭ މުހިއްމު ފޮތްތަކެއް ހިލޭ ބަހަން ފަށައިފިއެވެ.
އިސްލާމީ މަރުކަޒުގެ ޖަލްސާކުރާ މާލާމުގައި މިއަދު ކުރިއަށްދިޔަ ޙައްޖުވެރިންގެ ފުރަތަމަ ތަމްރީން ބައްދަލުވުމުގެ ތެރެއިން، އިސްލާމިކް މިނިސްޓްރީން ވަނީ ޙައްޖުވެރިންނަށް މި ފޮތްތައް ހަދިޔާކޮށްފައެވެ.
މީގެ ތެރޭގައި ހިމެނޭ ބައެއް ފޮތްތަކަށް ބަލައިލާއިރު، މި ފަހުން ތަރުޖަމާކޮށް ނިންމާފައިވާ ފޮތްތައް ކަމަށްވާ ”ކީރިތި ޤުރުއާނާއި ސުންނަތުގެ އަލީގައި ޙައްޖާއި ޢުމްރާގެ އަޅުކަން އަދާކުރާނެ ގޮތް“ އާއި، ”އަލްމަސްޖިދުއްނަބަވީއަށް ޒިޔާރަތްކުރުން“ ފަދަ ބައެއް ފޮތްތައް ހިމެނޭކަން ފާހަގަކޮށްލެވެއެވެ.
މި ފޮތްތައް ތަރުޖަމާކޮށްދެއްވީ އައްޝައިޚް ޢަބްދުލްޤާދިރު މުޙައްމަދެވެ. އަދި ފޮތްތައް މުރާޖަޢާކޮށްދެއްވީ އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދެވެ.
އިސްލާމިކް މިނިސްޓްރީން ވަނީ މިއަހަރުން ފެށިގެން ކުރިއަށް އޮތް ކޮންމެ އަހަރަކު ވެސް، މި ފޮތްތަކާއި، ޙައްޖާއި ޢުމްރާއާއި ގުޅޭ އެކި ފޮތްތައް، ރާއްޖެއިން ފުރާ އެންމެހައި ޙައްޖުވެރިންނަށް ފޯރުކޮށްދިނުމަށް ނިންމައިފައެވެ.
