ޒާތީނުވެ، ދޮގު ނަހަދާ ވެސް ސަރުކާރަށް ފާޑުކިޔާ ޒިންމާދާރު ކުރެވޭނެ ކަމަށް ރައީސުލްޖުމްހޫރިއްޔާގެ އޮފީހުގެ ކުރީގެ ތަރުޖަމާނު އަދި މިހާރުގެ ހެރިޓޭޖް މިނިސްޓަރު ހީނާ ވަލީދު ވިދާޅުވެއްޖެއެވެ.
”އަދަދު“ ނޫހުން ނެރެފައިވާ ޑޮކިއުމަންޓްރީއާ ގުޅޭގޮތުން އެއްވެސް ވާހަކައެއް ނުދެއްކުމަށާއި، އެ ޑޮކިއުމަންޓްރީ ދައުރު ނުކުރުމަށް ކްރިމިނަލް ކޯޓުން އަމުރެއް ނެރެފައި އޮއްވާ، ހޯމަ ދުވަހު ނޫސްވެރިންނާއެކު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބޭއްވެވި ބައްދަލުވުމެއްގައި އެ ނޫހުގެ ނޫސްވެރިއެއް ކަމަށްވާ ޝަހުޒާން ވަނީ ކޯޓުން ނެރެފައިވާ އަމުރާ ހިލާފުވެ، އެ ޑޮކިއުމަންޓްރީގައި ހިމެނޭ ކަންކަމާ ގުޅޭގޮތުން ރައީސްއާ ސުވާލުކޮށްފައެވެ.
ކޯޓު އަމުރާ ހިލާފަށް އަމަލުކޮށްފައިވާތީ ޝަހުޒާން ވަނީ 15 ދުވަހުގެ މުއްދަތަކަށް ބަންދުކޮށްފައެވެ.
މި މައްސަލައާ ގުޅިގެން މީސް މީޑިއާގައި ހިއްސާކުރެއްވި ޕޯސްޓެއްގައި ހީނާ ވިދާޅުވީ، ރާއްޖޭގައި އުޅެނީ ނޫސްވެރިކަމުގެ މިނިވަންކަމާއި ހިޔާލު ފާޅުކުރުމުގެ މިނިވަންކަން ހަނިވެގެން ނުވަތަ ނިގުޅައިގަނެގެނެއްނޫން ކަމަށެވެ. ނަމަވެސް މި ހައްގުތައް އޭގެ އެއްވެސް ހައްދެއް އިމެއްނެތި ތަންމިނަށް ހުޅުވާލުމުން، އެ މިނިވަންކަމުގެ ނާޖާއިޒް ފައިދާ ނަގައިގެން ރައީސަށް ޤަޛްފު ކޮށްފައިވާކަން ހީނާ ވަނީ ފާހަގަކުރައްވައިފައެވެ.
މިއަދު މިއުޅެނީ ނޫސްވެރިކަމުގެ މިނިވަންކަމާއި ޚިޔާލު ފާޅުކުރުމުގެ މިނިވަންކަން ހަނިވެގެންނެއް ނޫން. ނިގުޅައިގަނެގެން އަތުލައިގަނެގެނެއްނޫން. މިއަދު މިއުޅެނީ މި ޙައްޤުތައް އޭގެ އެއްވެސް ޙައްދެއް އިމެއްނެތި ތަންމިނަށް ހުޅުވާލުމުން، އެ މިނިވަންކަމުގެ ނާޖާއިޒް ފައިދާ ނަގައިގެން…
— Heena Waleed 🇲🇻 (@HeenaWaleed) May 12, 2026
ރައީސްއާ ސުވާލުކުރާ ހުރިހާ ނޫސްވެރިން ފުލުހަށް ނުވަތަ ކޯޓަކަށް ނުވަތަ ޖަލަކަށް ވެސް ނުގެންދާކަން ފާހަގަކުރައްވަމުން ހީނާ ވިދާޅުވީ، ނުގެންދޭ. ނޫސްވެރިން ބޭނުން ސުވާލެއް ކުރުމުގެ ފުރުސަތު އަބަދުވެސް ލިބިދީފައިވާ ކަމަށެވެ. ނަމަވެސް ދިވެހިރާއްޖޭގެ ދުސްތޫރީ ކޯޓަކުން ގެގް އޯޑަރެއް ނެރެފައި އޮތުމުން އެއަށް އަމަލުނުކޮށް، ހިތު ހުރިގޮތަކަށް އެ އަމުރާ ހިލާފުވާން ފުރުސަތުދިނުމުގެ އިހުތިޔާރެއް ހުދު ރައީސަށް ވެސް ލިބިވަޑައިނުގަންނަވާ ކަމަށް ހީނާ ވިދާޅުވިއެވެ.
”މި ގައުމުގައި ސިޔާސީ މީހުންގެ އަބުރަށް އަރައިގަތުމާ މީހުންގެ ބޮލުގައި ދޮގު އިލްޒާމް އަޅުވައިގެން އެކަމުން ސިޔާސީ ނަފާ ހޯދުމަށްޓަކައި ގާނޫނުއަސާސީން ލިބިދީފައިވާ މިނިވަންކަން ނާޖާއިޒު ގޮތުގައި ބޭނުން ކުރުންދަނީ ރޯވަމުންދާ އަލިފާން ގަނޑެއްފަދައިން ފެތުރެމުން،“ – ހީނާ ވިދާޅުވިއެވެ.
ހީނާ ވިދާޅުވީ، ރާއްޖޭގައި ހެދިފައިވާ ގާނޫނުތައް ތަންފީޒު ކުރެވޭނެ ކަމަށާއި ގާނޫނުތަކާ ހިލާފުވުމުން ފިޔަވަޅު ވެސް އަޅާނެ ކަމަށެވެ. ގާނޫނު ތަންފީޒުކުރުމަކީ ހުރިހާ ރައްޔިތުންގެ ހައްގުތައް ރައްކާތެރި ކުރުމަށްް އެޅޭ މުހިއްމު ފިޔަވަޅެއްކަން ފާހަގަކުރައްވަމުން ހީނާ އިތުރަށް ވިދާޅުވީ، ޒާތީނުވެ، ދޮގު ނަހަދާ އަދި އަބުރާ ނުބެހި ވެސް ސަރުކާރަށް ފާޑުކިޔާ ޒިންމާދާރު ކުރެވޭނެ ކަމަށެވެ.
