ބައިނަލްއަޤުވާމީ ނަރުހުންގެ ދުވަހުގެ މުނާސަބަތުގައި، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވަނީ ދިވެހި ސިއްޙީ ދާއިރާގައި ނަރުހުން އަދާކުރާ މުހިންމު ދައުރު ފާހަގަކުރައްވައި، އެ ފަރާތްތަކަށް ޚާއްޞަ މެސެޖެއް ފޮނުއްވާފައެވެ.
ރައީސުލްޖުމްހޫރިއްޔާގެ މެސެޖުގައި ފާހަގަކުރެއްވި ގޮތުގައި، ނަރުހުންނަކީ ދެމެހެއްޓެނިވި ޞިއްޙީ ނިޒާމެއްގެ އެންމެ ވަރުގަދަ ބިންގަލެވެ. ބަލިމީހުންނަށް ފަރުވާދިނުމާއި، ބަލިތަކުން ރައްކާތެރިވުމަށް މަސައްކަތްކުރުމުގެ އިތުރުން، މުޅި މުޖުތަމައުގެ ދުޅަހެޔޮކަން ދެމެހެއްޓުމުގައި ނަރުހުން އަދާކުރަނީ އަގުނުކުރެވޭފަދަ މުހިންމު ދައުރެކެވެ. ދުނިޔެއަށް ކުރިމަތިވަމުންދާ ޞިއްޙީ ގޮންޖެހުންތަކާއެކު، ނަރުހުންގެ ޚިދުމަތުގެ މުހިންމުކަން ކުރިއަށްވުރެ ބޮޑުވެފައިވާކަން އެމަނިކުފާނު ފާހަގަކުރެއްވިއެވެ.
On this International Nurses Day, we recognize nursing as a cornerstone of sustainable healthcare. Nurses are indispensable, playing vital roles in patient care, recovery, disease prevention, and community wellbeing. As global challenges evolve, their contribution has never been…
— Dr Mohamed Muizzu (@MMuizzu) May 12, 2026
މި ސަރުކާރުން ނަރުހުންގެ ކުރިއެރުމަށާއި ދުޅަހެޔޮކަމަށް އިސްކަންދޭނެކަން ހާމަކުރައްވަމުން ރައީސުލްޖުމްހޫރިއްޔާ ވިދާޅުވީ، ނަރުހުންނަށް ކުރިމަތިވާ ގޮންޖެހުންތަކަށް ޙައްލު ހޯދައިދިނުމަށް މި ސަރުކާރުން ސާބިތުކަމާއެކު މަސައްކަތް ކުރާނެ ކަމަށެވެ. އެގޮތުން ނަރުހުންގެ މަސައްކަތުގެ މާޙައުލު ރަނގަޅުކުރުމަށާއި، ލިބޭ ޢިނާޔަތްތައް އިތުރުކުރުމުގެ އިތުރުން، ސިޔާސަތުތައް ވަރުގަދަކޮށް ތަމްރީނުގެ ފުރުޞަތުތައް ފުޅާކުރުމަށް ސަރުކާރުން ޚާއްޞަ އިސްކަމެއް ދޭނެއެވެ. މީގެ ބޭނުމަކީ ކުރިމަގުގައި ރާއްޖޭގައި ވަރުގަދަ އަދި އިތުބާރު ހުރި ޞިއްޙީ ނިޒާމެއް ބިނާކުރުން ކަމުގައި ރައީސުލްޖުމްހޫރިއްޔާ ވިދާޅުވިއެވެ.
މީގެ އިތުރުން، ރާއްޖޭގެ ހުރިހާ ނަރުހުން ޤައުމަށްޓަކައި ވަމުންދާ ގުރުބާނީއަށާއި ކުރަމުންދާ އިޚްލާޞްތެރި މަސައްކަތަށްޓަކައި ރައީސުލްޖުމްހޫރިއްޔާ ވަނީ ހިތުގެ އަޑިން ޝުކުރު އަދާކުރައްވާފައެވެ.
ބައިނަލްއަޤުވާމީ ނަރުހުންގެ ދުވަސް ފާހަގަކުރަމުންދާއިރު، ސަރުކާރުގެ އަމާޒަކީ ނަރުހުންގެ ފަންނީ އަދި އަމިއްލަ ކުރިއެރުމަށް މަގުފަހިކޮށްދީ، ޝަރަފުވެރި ދިރިއުޅުމެއް އެފަރާތްތަކަށް ހޯދައިދިނުމެވެ.
