ގަވާއިދާ ހިލާފަށް ވިޔަފާރިތަކުގައި ހަރަކާތްތެރިވާ ބިދޭސީންގެ މައްސަލަތައް ދެނެގަތުމަށް، ބިދޭސީންގެ އެކައުންޓުތަކުގައި ފައިސާ ދައުރުކުރާ ގޮތް ބެލުމުގެ މަސައްކަތް ވަރަށް އަވަހަށް ފަށާނެ ކަމަށް އިކޮނޮމިކް މިނިސްޓަރު މުޙައްމަދު ސަޢީދު ވިދާޅުވެއްޖެއެވެ.
މިނިސްޓަރު ސަޢީދު މި މޭރުމުން ވިދާޅުވީ، ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުންނެވެ. ސަޢީދު ވިދާޅުވީ، ބައެއް ވިޔަފާރިތަކުގައި ބިދޭސީން އިސްކޮށް ހަރަކާތްތެރިވާ ކަމަށް ބުނެ ގިނަ ޝަކުވާތަކެއް މިނިސްޓްރީއަށް ލިބިފައިވާ ކަމަށެވެ.
ނަމަވެސް އިކޮނޮމިކް މިނިސްޓްރީން އިސްވެ އެފަދަ ވިޔަފާރިތައް ބަލައި ފާސްކުރިއިރު، އެތަންތަނަކީ ގިނަ ފަހަރަށް ދިވެހިންގެ ނަމުގައި ހިންގަމުން އަންނަ ވިޔަފާރިތައްކަން ފާހަގަކުރެވިފައިވާ ކަމަށް ސަޢީދު ވަނީ ވިދާޅުވެފައެވެ. ސަޢީދު ވިދާޅުވީ، މިފަދަ ތަންތަން ބަލައި ފާސްކުރުމަށްފަހު އެތަނުގައި މަސައްކަތް ކުރާ ބިދޭސީ މީހާއަކީ ގަވައިދާ ހިލާފަށް މަސައްކަތްކުރާ މީހެއްތޯ ބަލާ ކަމަށާއި، ގަވައިދާ ހިލާފަށް މަސައްކަތްކުރާ މީހެއް ނަމަ، ވަގުތުން އެ މީހަކު އިމިގްރޭޝަނާ ހަވާލުކުރާ ކަމަށެވެ.
ސަޢީދު ވިދާޅުވި ގޮތުގައި، އެފަދަ މައްސަލަތައް ފާހަގަކުރެވުމުން އެކަމަށް ހައްލެއް ހޯދުމަށް، ވިޔަފާރިވެރިންނާއި ބިޒްނަސް ކައުންސިލަށް ހުށަހެޅި ކަމަށާއި، ބިޒްނަސް ކައުންސިލާއި ވިޔަފާރިވެރިން ވެސް ލަފާދީފައިވަނީ ބިދޭސީންގެ މީރާ އެކައުންޓާއި ބޭންކު އެކައުންޓުތައް ދައުރުވާ ގޮތް ބެލުމަށް ކަމަށެވެ.
ސަޢީދު ވަނީ ބިދޭސީން ހަރަކާތްތެރިވާ ވިޔަފާރިތަކާ ގުޅޭގޮތުން ވެސް މައުލޫމާތުތަކެއް ހިއްސާކުރައްވައިފައެވެ. އެގޮތުން، މިދިޔަ އަހަރުގެ ނޮވެމްބަރު މަހުގެ 29 ވަނަ ދުވަހުން ފެށިގެން މި އަހަރުގެ މިހާތަނަށް 242 ތަނެއް ބަލައި ފާސްކޮށް އޭގެތެރެއިން 102 ވިޔަފާރިއެއް ބަންދުކޮށްފައިވާ ކަމަށް ސަޢީދު ވިދާޅުވިއެވެ.
ސަޢީދު ވިދާޅުވީ، ބަންދު ކުރި ވިޔަފާރިތަކުގެ ތެރެއިން ޖުމުލަ 57 ތަނަކީ ނުގަވައިދުން ހިންގަމުންދިޔަ ވިޔަފާރިތަކެއް ކަމަށާއި އޭގެ ތެރޭގައި ސެލޫން އަދި ސްޕާގެ ގޮތުގައި ހިންގާ 45 ތަނެއް ހިމެނޭ ކަމަށެވެ. މީގެ އިތުރުން، ބަންދު ކުރި ވިޔަފާރިތަކުގެ ތެރެއިން ވަރަށް ކުދިކުދި މައްސަލަތަކާ ގުޅިގެން ރަނގަޅުކުރަންޖެހޭ ކަންކަން ރަނގަޅުކުރުމަށް އަންގައި، އެކަންކަން ރަނގަޅުކުރުމުން 61 ތަން އަލުން ހުޅުވަން ހުއްދަ ދީފައިވާނެ ކަމަށް ސަޢީދު ވަނީ އިތުރަށް ވިދާޅުވެފައެވެ.
