މުސްލިމުންނަށް އޮތީ ހެކި ދެއްކެން ނެތް ވާހަކަތައް ނުދެއްކުން ކަމަށް މަޝްހޫރު ދީނީ އިލްމުވެރިޔާ ޝެއިޚް ޢަލީ ޒައިދު ވިދާޅުވެއްޖެއެވެ.
ޝެއިޚް މި މޭރުމުން ވިދާޅުވީ ”އަދަދު“ ނޫހުން މި ފަހުން ދައުރުކޮށްފައިވާ ޑޮކިއުމަންޓްރީއާ ގުޅިގެން، މުޖުތަމައުގެ ތެރޭގައި ދައްކަން ނުޖެހޭ ފަދަ ބޭއަދަބީ ވާހަކަތައްދައްކަމުން އަންނަ ފަރާތްތައް އިތުރުވަމުންދާތީ މީސް މީޑިއާގައި ހިއްސާކުރެއްވި ޕޯސްޓެއްގައެވެ. ޝެއިޚް ވިދާޅުވީ، މުސްލިމުންނަށް އޮތީ ހެކި ދެއްކެން ނެތް ވާހަކަ ނުދެއްކުން ކަމަށާއި ވަކިން ހާއްސަކޮށް ފާހިޝް ކަންކަމުގެ ވާހަކަތައް، ހެކި ނެތް ހާލަތުގައި ފެތުރުމަކީ ބޮޑުވެގެންވާ ފާފައެއް ކަމަށެވެ.
މުސްލިމުންނަށް އޮތީ ހެކި ދެއްކެން ނެތް ވާހަކަ ނުދެއްކުން! އަމުދުން ފާޙިޝް ކަންކަމުގެ ވާހަކަ ހެކިނެތް ޙާލަތުގައި ފެތުރުމަކީ ފާފައެއް! މީހަކު އަމިއްލަ ނަފްސުގެ މައްޗަށް ފާޙިޝް ކަން ސާބިތު ކުރާނަމަ އެފަދަ މީހެއްގެ މައްޗަށް (އެއީ އަދި ދޮގެއްކަމަށްވިޔަސް) ފިޔަވަޅު އެޅިދާނެ! އެއީ…
— Ali Zaid (@alizaid1000) May 11, 2026
ބުއްދި ސަލާމަތުން ހުރި މީހަކު، އަމިއްލަ ނަފްސުގެ މައްޗަށް ފާހިޝްކަން ސާބިތުކުރާނަމަ އެފަދަ މީހެއްގެ މައްޗަށް އެއީ އަދި ދޮގެއްކަމަށް ވިޔަސް ފިޔަވަޅުއެޅިދާނެކަން ފާހަގަކުރައްވައި ޝެއިޚް ވިދާޅުވީ، ހެއްކެއް ނެތި ހަމަ އެކަނި މީހަކު އައިސް އޭނާގެ އަމިއްލަ ނަފްސުގެ މައްޗަށް ވާ އިގުރާރަކުން އަނެއް މީހާ އިޖުރާމް ނުކުރެވޭނެ ކަމަށެވެ.
”މީހަކު އަމިއްލަ ނަފްސުގެ މައްޗަށް ފާހިޝްކަން ސާބިތުކުރާނަމަ އެފަދަ މީހެއްގެ މައްޗަށް އެއީ އަދި ދޮގެއްކަމަށްވިޔަސް ފިޔަވަޅު އެޅިދާނެ، އެއީ އެފަދަ އިންސާނަކީ ބުއްދި ސަލާމަތުން ހުރި މީހެއްކަމަށްވާނަމަ،“ – ޝެއިޚް ވިދާޅުވިއެވެ.
ޝެއިޚް އިތުރަށް ވިދާޅުވީ، ގިނަ ފަހަރަށް ލާރިއާއި ސިޔާސީ ފައިދާއަށް ބައެއް ފަރާތްތަކުން މިފަދަ ނުބައިކަންކަން، ވަކިން ހާއްސަކޮށް މީހުންގެ ކަތިލުމަށްޓަކައި އަމިއްލަ ނަފްސަށް އިގުރާރްވުން ފަދަކަންކަން ކުރާ ކަމަށެވެ.
