”އަދަދު“ ނޫހުން މިފަހުން ދައުރުކުރި ޑޮކިއުމަންޓްރީއާ ގުޅޭ އެއްވެސް ވާހަކައެއް ނުދެއްކުމަށާއި އެ ޑޮކިއުމަންޓްރީ ދައުރުނުކުރުމަށް މޯލްޑިވްސް މީޑިއާ އެންޑް ބްރޯޑްކާސްޓިންގ ރެގިއުލޭޝަން ކޮމިޝަނުން މީޑިއާތަކަށް އަންގައިފިއެވެ.
މި މައްސަލާގައި ކޯޓުން ވަކި ގޮތެއް ކަނޑައަޅަންދެން، ”އަދަދު“ ނޫހުން ދައުރުކޮށްފައިވާ ޑޮކިއުމަންޓްރީގެ ވާހަކަ ސީދާ ގޮތުންނާއި ނުސީދާ ގޮތުން ވެސް ނުދެއްކުމަށާއި އަދި އެ ޑޮކިއުމަންޓްރީ ދައުރު ނުކުރުމުގެ އިތުރުން ކުށުގެ ޝިކާރައަށްވީ މީހާ ގެ އެއްވެސް ވާހަކައެއް ނުދެއްކުމަށް އަންގައި ކްރިމިނަލް ކޯޓުން ވަނީ އަމުރެއް ނެރެފައެވެ.
ކޯޓުގެ މި އަމުރަށް ހުރިހާ މީޑިއާތަކުން ވެސް ތަބާވުމަށް މީޑިއާތަކުގެ ބެލެނިވެރި ފަރާތުގެ ހައިސިއްޔަތުން މީޑިއާ ކޮމިޝަނުން ވަނީ އެދިފައެވެ.
”މީޑިއާތަކުން ކޮންޓެންޓް އާންމުކުރުމުގައި ކޯޓު އަމުރުގައި ފާހަގަކޮށްފައިވާ ކަންކަމާ އެއްގޮތްވާ ގޮތުގެ މަތިން އަމަލު ކުރަން މީޑިއާގެ ބެލެނިވެރި ފަރާތުގެ ހައިސިއްޔަތުން އަންގަން،“ – މީޑިއާ ކޮމިޝަނުން ބުނެފައިވެއެވެ.
މީގެ އިތުރުން މި މައްސަލައާ ގުޅޭ އެއްވެސް ވާހަކައެއް ނުދެއްކުމަށް އިލެކްޝަންސް ކޮމިޝަން (އީސީ) އިން ވަނީ ސިޔާސީ ޕާޓީތަކަށް ވެސް އަންގައިފައެވެ. ނަމަވެސް އިދިކޮޅު އެމްޑީޕީއާއި ކުރީގެ ރައީސް ޔާމީނުގެ ޕީއެންއެފްއިން އިލެކްޝަންސް ކޮމިޝަނުގެ މި އެންގުމާއި ހިލާފުވެ، އެ ޕާޓީތަކުން ބާއްވާ ޖަލްސާތަކާއި މުޒާހަރާތަކުގައި އަންނަނީ މިކަމަށް ހިތްވަރު ލިބޭ ގޮތަށް ވާހަކަތައްދައްކަމުންނެވެ.
