ސިޔާސީ ޕާޓީތަކުގެ ގާނޫނާ ހިލާފަށް ސިޔާސީ ހަރަކާތްތައް ހިންގުމުގެ ސަބަބުން ކުރީގެ ރައީސް ޢަބްދުﷲ ޔާމީނުގެ ޕާޓީ ޕީއެންއެފް އެއްލައްކަ ރުފިޔާއިން ޖޫރިމަނާކުރުމުން އެއީ ޕާޓީއާއި އެއްވެސް ގުޅުމެއްނެތް ހަރަކާތްތަކެއް ކަމަށް ބުނެ އެ ޕާޓީން މިފަހަރު ވެސް ބޮޑު ދޮގެއް ހަދައިފިއެވެ.
އިލެކްޝަންސް ކޮމިޝަން (އީސީ) އިން ވަނީ ސިޔާސީ ޕާޓީތަކުގެ ގާނޫނާ ތަކުރާރުކޮށް ޕީއެންއެފްއިން ހިލާފުވެފައިވާތީ އެއްލައްކަ ރުފިޔާއިން އެ ޕާޓީ ޖޫރިމަނާ ކުރާ ކަމަށާއި އަދި ގާނޫނާ ހިލާފުވާނަމަ ވަކިވަކި ފަރާތްތަކާ މެދު ވެސް ގާނޫނީ ފިޔަވަޅު އަޅާނެ ކަމަށް ބުނެ ރައީސް ޔާމީނަށް ސިޓީއެއް ފޮނުވައިފައެވެ.
އީސީން ޕީއެންއެފްގެ މައްޗަށް މިފަދަ ފިޔަވަޅެއް އަޅާފައި މިވަނީ އެ ޕާޓީން، އެހެން ޕާޓީތަކުގެ ބައްދަލުވުންތަކަށް ހުރަސް އެޅޭ ފަދަ އަމަލުކޮށް، އެހެން ޕާޓީއެއްގެ ބައްދަލުވުމެއް ހިނގަމުންދާ ތަނެއްގައި އެ ވަގުތާ ދިމާކޮށް ހަރަކާތްތައް ބާއްވައި، ހުއްދަ ނޫން ތަންތާނގައި އާންމު ބައްދަލުވުން ބޭއްވުމުގެ އިތުރުން އާންމު ބައްދަލުވުން ބާއްވާ ތަނާއި ވަގުތު 24 ގަޑިއިރު ކުރިން ކޮމިޝަނަށް ނާންގައި ހަރަކާތްތައް ބާއްވަމުންނެވެ.
މިކަމާ ގުޅިގެން ޕީއެންއެފްއިން ބުނެފައިވަނީ ހިޔާލީ ވިސްނުންތަކެއްގެ މައްޗަށް ބިނާކޮށް ޕާޓީއާއި ގުޅުމެއްނެތް ކަމެއްގައި އެ ޕާޓީ ޖޫރިމަނާކޮށްފައިވާކަން ބަޔާންކޮށް ސިޓީއެއް ފޮނުވުމަކީ ދެކޮޅު ނުޖެހޭ ކަމެއް ކަމަށެވެ. މި މައްސަލައާ ގުޅިގެން ޕީއެންއެފްއިން ވަނީ އީސީއަށް ސިޓީއެއް ވެސް ފޮނުވައިފައެވެ.
ޕީއެންއެފްގެ އެ ސިޓީގައި ބުނެފައިވަނީ، އީސީގެ މި އަމަލަކީ މިނިވަން މުއައްސަސާއަކުން އަމަލުކުރަންޖެހޭ މިންގަނޑުގެ ބޭރުން، ސަރުކާރުގެ ނުފޫޒުގެ މައްޗަށް ބިނާކޮށް ހިންގާފައިވާ ދަށުދަރަޖައިގެ އަމަލެއް ކަމަށެވެ. ޕީއެންއެފްއިން ބުނި ގޮތުގައި، އެ ޕާޓީން ރަސްމީ ސިޔާސީ ހަރަކާތެއްގެ ގޮތުގައި ކުރިއަށްގެންދަނީ ’ޓައުންހޯލް‘ ޖަލްސާ އެކަންޏެވެ. އެގޮތުން ރޭގެ ވަގުތެއްގައި މިފަދަ ޖަލްސާއެއް ކުރިއަށް ގެންގޮސްފައިވާނެ ކަމަށް އެ ޕާޓީން ބުނެފައިވެއެވެ.
ޕީއެންއެފްއިން މި މޭރުމުން ބުނެފައިވީ ނަމަވެސް އެއްވެ އުޅުމުގެ މިނިވަންކަމުގެ ނަމުގައި ޕީއެންއެފްގެ އެކްޓިވިސްޓުން އަންނަނީ ކޮންމެ ރެއަކުހެން ބޭއަދަބީ މުޒާހަރާތައް ބާއްވައި އާންމުންނަށް އުނދަގޫކުރަމުންނެވެ. މި މުޒާހަރާތަކުގައި ބޭއަދަބީ ވާހަކަތައްދެއްކުމާއި އަވަގުރާނަ ގޮވުން ފަދަ އާންމު އިޖުތިމާއި މިންގަނޑުތަކާ ހިލާފު އެތައް ކަމެއް ހިނގައެވެ.
