އަޟްޙާ ޢީދު ފާހަގަކުރުމުގައި މި ސަރުކާރުގެ ފަރާތުން ކުރާ ހަރަދުތައް ބޮޑުތަނުން ކުޑަވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.
އެމަނިކުފާނު މި މޭރުމުން ވިދާޅުވީ ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ”އެކި އެމްވީ“ ގެ ފަރާތުން ކުރި ސުވާލަށް ޖަވާބުދެއްވަމުންނެވެ. ރައީސް ވިދާޅުވީ، މީގެ ކުރިން ސަރުކާރުން ބައެއް ރަށްތަކުގައި ޢީދުގެ ކުޅިވަރު ހަރަކާތްތައް ހިންގި ނަމަވެސް މި ފަހަރު އެފަދަ ހަރަކާތްތައް ވަކި ރަށްތަކެއްގައި ސަރުކާރުން ނުހިންގާނެ ކަމަށެވެ.
ކުންފުނިތަކުން ހަރަދު ކުޑަކުރުމަށް ޕީސީބީން އަމުރުކޮށް، އިރުޝާދުތަކެއް ފޮނުވައިފައިވާކަން ފާހަގަކުރައްވަމުން ރައީސް ވިދާޅުވީ، ޕީސީބީގެ އެންގުމާ އެއްގޮތަށް ކުންފުނިތަކުން މިފަހަރުވެސް ހަރަދު ކުޑަކުރުމުގެ ކަންކަން ކުރިއަށްގެންދާނެ ކަމަށެވެ. އޭގެތެރޭގައި ހަމައެކަނި ޢީދާ ދިމާކޮށް ރަށްރަށުގައި ހިންގާ ކުޅިވަރު ހަރަކާތްތަކާއި، މުވައްޒަފުންގެ އަދަދު މަދުކުރުން ހިމެނޭ ކަމަށް އެމަނިކުފާނު ވިދާޅުވިއެވެ.
”އޭގެ ތެރޭގައި ހަމައެކަނި ކުޅިވަރުތަކެއް ނޫން، މުވައްޒަފުންގެ އަދަދު މަދުކުރުމާއި މިހެން ގޮސް ކުންފުނިތަކުގެ ހަރަކާތްތައް އިތުރަށް ސްޓްރީމް ލައިންކުރުމަށްޓަކައި އެފިޝިއެންޓް ކުރުމަށްޓަކައި އެ ގެނެވޭ ބަދަލުތައް އެބަގެނެވޭ މިހާރު،“ – ރައީސް ވިދާޅުވިއެވެ.
ކުންފުނިތަކުގެ ހަރަދުކުޑަކުރުމުގެ ވާހަކަދެކެވޭއިރު ފާހަގަކޮށްލަންޖެހޭ ކަމަކީ ސަރުކާރުން އަންނަނީ މިނިސްޓްރީތަކާއި ސަރުކާރުގެ ކުންފުނިތަކުގައި ތިބި ސިޔާސީ މުވައްޒަފުންގެ އަދަދު މަދުކުރުމަށްޓަކައި ކުރަންޖެހޭ މަސައްކަތްތައް ކުރަމުންނެވެ އެގޮތުން ސިޔާސީ މުވައްޒަފުންގެ 33 އިންސައްތަ ސިޔާސީ މުވައްޒަފުން ވަކިކުރުމަށް ސަރުކާރުން ވަނީ ނިންމައިފައެވެ.
