ސިޔާސީ ޕާޓީތަކުގެ ގާނޫނާ ތަކުރާރުކޮށް ހިލާފުވެފައިވާތީ ކުރީގެ ޢަބްދުﷲ ރައީސް ޔާމީނުގެ ޕާޓީ، ޕީޕަލްސް ނެޝަނަލް ފްރަންޓް (ޕީއެންއެފް) އެއްލައްކަ ރުފިޔާއިން ޖޫރިމަނާކޮށްފިއެވެ.
މިކަމާ ގުޅިގެން އިލެކްޝަންސް ކޮމިޝަން (އީސީ) އިން ރައީސް ޔާމީނަށް ފޮނުއްވި ސިޓީގައި ބުނެފައިވަނީ، ސިޔާސީ ޕާޓީތަކުގެ ގާނޫނާ ތަކުރާރުކޮށް ޕީއެންއެފްއިން ހިލާފުވެފައިވާތީ އެއްލައްކަ ރުފިޔާއިން އެ ޕާޓީ ޖޫރިމަނާ ކުރާ ކަމަށެވެ. މީގެ އިތުރަށް ގާނޫނާ ހިލާފުވާނަމަ ވަކިވަކި ފަރާތްތަކާ މެދު ވެސް ގާނޫނީ ފިޔަވަޅު އަޅާނެކަމުގެ އިންޒާރު އެ ކޮމިޝަނުން ވަނީ ދީފައެވެ.
އީސީން ފާހަގަކޮށްފައިވާ ގޮތުގައި، ޕީއެންއެފްއިން ދަނީ އެހެން ޕާޓީތަކުގެ ބައްދަލުވުންތަކަށް ހުރަސް އެޅޭ ފަދަ އަމަލުކޮށް، އެހެން ޕާޓީއެއްގެ ބައްދަލުވުމެއް ހިނގަމުންދާ ތަނެއްގައި އެ ވަގުތާ ދިމާކޮށް ހަރަކާތްތައް ބާއްވައި، ހުއްދަ ނޫން ތަންތާނގައި އާންމު ބައްދަލުވުން ބޭއްވުމުގެ އިތުރުން އާންމު ބައްދަލުވުން ބާއްވާ ތަނާއި ވަގުތު 24 ގަޑިއިރު ކުރިން ކޮމިޝަނަށް ނާންގައި ހަރަކާތްތައް ބާއްވަމުންނެވެ.
މިކަންކަން ފާހަގަކޮށް މީގެ ކުރިން ނަސޭހަތްތެރިވެ، ސިޓީ ފޮނުވައި، ކޮމިޝަނާ ބައްދަލުކުރުމަށް ޕީއެންއެފްއަށް ދައުވަތުދީފައިވީ ނަމަވެސް އެ ޕާޓީން ސިޓީއަށް ޖަވާބެއް ދީފައިނުވުމުގެ އިތުރުން، ކޮމިޝަނާ ބައްދަލުކުރުމަށް ވެސް އިންކާރުކޮށްފައިވާ ކަމަށް އީސީން ވަނީ ބުނެފައެވެ.
ޕީއެންއެފް ޖޫރިމަނާކޮށްފައިވަނީ ސިޔާސީ ޕާޓީގެ ގާނޫނުގެ 49 ވަނަ މާއްދާގެ ދަށުންނެވެ.
ފާހަގަކޮށްލެވޭ ގޮތުގައި އެއްވެ އުޅުމުގެ މިނިވަންކަމުގެ ނަމުގައި ޕީއެންއެފްގެ އެކްޓިވިސްޓުން އަންނަނީކޮންމެ ރެއަކު ވެސް ބޭއަދަބީ މުޒާހަރާތައް ބާއްވަމުންނެވެ. މި މުޒާހަރާތަކުގައި ބޭއަދަބީ ވާހަކަތައްދެއްކުމާއި އަވަގުރާނަ ގޮވުން ފަދަ އާންމު އިޖުތިމާއި މިންގަނޑުތަކާ ހިލާފު އެތައް ކަމެއް އެ ޕާޓީގެ އެކްޓިވިސްޓުން އަންނަނީ ކުރަމުންނެވެ.
