ނޫސް ކޮންފަރެންސްތަކަކީ ޒާތީގޮތުން ދިމާކުރުމާ، ކޯޓުތަކުގެ ހުރުމަތް ކެނޑުމަށް އޮތް ފުރުސަތެއް ނޫން ކަމަށް އިކޮނޮމިކް މިނިސްޓަރު މުޙައްމަދު ސަޢީދު ވިދާޅުވެއްޖެއެވެ.
މިނިސްޓަރު ސަޢީދު މި މޭރުމުން ވިދާޅުވީ، ރައީސުލްޖުމްހޫރިއްޔާގެ އޮފީހުގައި މިއަދު ކުރިއަށް ދިޔަ ނޫސްވެރިންގެ ބައްދަލުވުމެއްގެ ތެރެއިން ”އަދަދު“ ނޫހުގެ ނޫސްވެރިޔަކު އަމަލުކުރި ގޮތާ ގުޅިގެން މީސް މީޑިއާގައި ހިއްސާކުރެއްވި ޕޯސްޓެއްގައެވެ. އެ ޕޯސްޓުގައި ސަޢީދު ވިދާޅުވީ، ހިޔާލުފާޅުކުރުމާއި ނޫސްވެރިކަމުގެ މިނިވަން ކަމަށް މި ސަރުކާރުން އަބަދުވެސް ޖާގަދީފައިވާ ކަމަށާއި އެއީ ޑިމޮކްރަސީގެ އެންމެ ވަރުގަދަ އެއް އަސާސް ކަމަށެވެ.
ޚިޔާލުފާޅުކުރުމާއި ނޫސްވެރިކަމުގެ މިނިވަންކަމަށް މި ސަރުކާރުން އަބަދުވެސް ވަނީ ޖާގަދީފައި. މިއީ ޑިމޮކްރަސީގެ އެއްމެ ވަރުގަދަ އެއް އަސާސްވެސްމެ.
ނަމަވެސް، ލިބިފައިމިވާ މިނިވަންކަމުގެ ނާޖާއިޒް ފައިދާ ނަގައި، އޭގެ ހިޔަންޏަށް ވަދެ ތިބެ، ވާދަވެރި ސިޔާސީޕާޓީއަކުން އިދިކޮޅު… pic.twitter.com/hw5QJzvNXR
— Mohamed Saeed (@em_saeed) May 11, 2026
ނަމަވެސް ބައެއް ފަރާތްތަކުން ލިބިފައިވާ މިނިވަންކަމުގެ ނާޖާއިޒު ފައިދާ ނަގައި، އޭގެ ހިޔަންޏަށް ވަދެ ތިބެ، ވާދަވެރި ސިޔާސީ ޕާޓީއަކުން އިދިކޮޅު ހަރަކާތްތައް ހިންގާ އުސޫލުން ނޫސްވެރިކަމުގެ މައިކު ހިފައިގެން ރައީސުލްޖުމްހޫރިއްޔާގެ އޮފީސްތެރޭ ހަޅުތާލުކުރާ މޭރުމުން ކަންކަން ކުރާ ކަމަށާއި، ބައެއްް ނޫސްތަކުން ނޫސްވެރިކަމުގެ މިނިވަންކަން ނަހަމަ ގޮތުގައި ބޭނުންކުރަމުން އަންނަ ކަމަށް ސަޢީދު ވަނީ ވިދާޅުވެފައެވެ.
”ނޫސް ކޮންފަރެންސްތަކަކީ ޒާތީގޮތުން ދިމާކުރުމާ، ދޮގު ވާހަކަ ހަދަހަދައިގެން އިއްވުމާ، ގާނޫނުތައް މުގުރުމާ، ކޯޓުތަކުގެ ހުރުމަތް ކެނޑުމަށް އޮތް ފުރުސަތެއް ނޫން،“ – މިނިސްޓަރު ސަޢީދު ވިދާޅުވިއެވެ.
މީގެ ކުރީގެ އެއްވެސް ސަރުކާރެއްގައި ނޫސްވެރިންނަށް މައުލޫމާތުތައް ފޯރުކޮށްނުދޭ މިންވަރަށް މި ސަރުކާރުގައި ރައީސް މުޢިއްޒު އެ ފުރުސަތު ނޫސްވެރިންނަށް ދެއްވާފައިވާކަން ފާހަގަކުރައްވައި ސަޢީދު ވިދާޅުވީ، އެއްވެސް އިތުރު މޮޑަރޭޝަންއަކާ ނުލައި ކޮންމެ ހަފްތާއަކު އެއްފަހަރު ސީދާ ރައީސް ނޫސްވެރިންނާ ބައްދަލުކުރައްވައި މައުލޫމާތު ދެއްވަނީ ސަރުކާރުން ރައްޔިތުންނަށް ކޮށްދޭ ހިދުމަތްތަކާއި ސިޔާސަތުތައް ޒިންމާދާރު ނޫސްވެރިކަމުގެ ތެރެއިން ހާމަކޮށްދެއްވުމަށް ކަމަށެވެ.
