”އަދަދު“ ނޫހުން އާންމުކުރި ”އައިޝާ“ ޑޮކިއުމަންޓަރީ ދައުރުކުރުމާއި، އެއާ ގުޅޭ އެއްވެސް ވާހަކައެއް ނުދެއްކުމަށް ކްރިމިނަލް ކޯޓުން ނެރެފައިވާ އަމުރަށް ހުރިހާ ފަރާތްތަކުން ވެސް ތަބާވުމަކީ ލާޒިމު ކަމެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މުޢިއްޒު މި މޭރުމުން ވިދާޅުވީ، ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުންނެވެ. އެމަނިކުފާނު ވިދާޅުވީ، ކޯޓުގެ އަމުރަށް ތަބާވުމަކީ ދިވެހި ހުރިހާ ރައްޔިތުންގެ މައްޗަށް ލާޒިމު ކަމެއް ކަމަށާއި، އެކަމަކީ ކޯޓު އަމުރެއް އޮތް ކަމަކަށްވާތީ އެއްވެސް ރައްޔިތަކު އެއާ ގުޅޭގޮތުން އެއްޗެއް ބުނެގެން ނުވާނެ ކަމަށެވެ.
”ކޯޓުން ތި އޮތީ ގެގް އޯޑަރއެއް ނެރެފައި ތިކަމުގައި، އެހެންވީމާ އެ އަމުރަށް ތަބާވުމަކީ ދިވެހި ހުރިހާ ރައްޔިތުންގެ މައްޗަށް ލާޒިމު ކަމެއް، އެއީ އޭގެ ސީދާ ޖަވާބަކީ، އެކަމަކީ ކޯޓު އަމުރެއް އޮތް ކަމަކަށްވާތީ އެއްވެސް ރައްޔިތަކު އެއާ ގުޅޭގޮތުން އެއްޗެއް ވިދާޅުވެގެން ނުވާނެ،“ – ރައީސް ވިދާޅުވިއެވެ.
މިކަމަކީ ސަރުކާރުން އިސްނަގައިގެން ކުރާ ކަމެއް ނޫންކަން ފާހަގަކުރައްވަމުން ރައީސް ވިދާޅުވީ، ތިން ބާރު ވަކިވެފައި ނިޒާމެއްގައި ޝަރުއީ ދާއިރާގެ ހުރިހާ ކަމެއް ހިނގާނީ އެ ދާއިރާގެ ތެރެއިން ކަމަށެވެ.
މިއަދުގެ ނޫސްވެރިންގެ ބައްދަލުވުމުގައި ރައީސް ވަނީ ރާއްޖޭގައި ހިޔާލުފާޅުކުރުމުގެ މިނިވަންކަން ރާއްޖޭގައި އޮތް މިންވަރަށް ވެސް އަލިއަޅުއްވާލައްވައިފައެވެ. އެގޮތުން ދިވެހިރާއްޖެއަށްވުރެ ބޮޑަށް ހިޔާލުފާޅުކުރުމުގެ މިނިވަންކަން އޮތް އެހެން ގައުމެއް ނެތްކަން ފާހަގަކުރައްވަމުން ރައީސް ވިދާޅުވީ، ރާއްޖެއަކީ ސައްތައިން ސައްތަ އިސްލާމީ ގައުމެއް ކަމަށާއި ހިޔާލުފާޅުކުރުމުގެ މިނިވަންކަމުގެ ތެރޭގައި އިސްލާމްދީނުގައި ނަހީކުރައްވާފައިވާ ކަންކަމާއި، ގާނޫނުއަސާސީއާ ހިލާފު އެއްވެސް ކަމެއް ނުކުރެވޭނެ ކަމަށެވެ.
މީގެ އިތުރުން ނޫސްވެރިކަމުގެ ފާހެއް އޮތުމަކީ މީހުންގެ އަބުރަށް އަރައިގަނެ މީހުންގެ ކަރާމާތަށް އުނިކަމެއް އަތުވެދާނެފަދަ ކަންކަން ކުރުމަށް ލިބޭ ފުރުސަތެއް ނޫންކަމަށް ވެސް އެމަނިކުފާނު ވަނީ އިތުރަށް ވިދާޅުވެފައެވެ.
