ނިމިދިޔަ އެމްޑީޕީގެ ސަރުކާރުން އިންޑިއާއިން ނަގާފައިވާ 150 މިލިއަން ޑޮލަރުގެ ބޮޑު ދަރަނީގެ ތެރެއިން، މިއަދަށް މުއްދަތު ހަމަވި 50 މިލިއަން ޑޮލަރު ދިވެހި ސަރުކާރުން ދައްކާ ޚަލާސްކޮށްފިއެވެ. މިކަން ހާމަކުރެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނޫސްވެރިންނާ ބައްދަލުކުރައްވައި ދެއްކެވި ވާހަކަފުޅުގައެވެ.
މިކަން ހާމަކުރެއްވީ މިހާރު ރައީސްއޮފީހުގައި ކުރިއަށްދާ ރައީސުލްޖުމްހޫރިއްޔާގެ ނޫސްވެރިންގެ ބައްދަލުވުމުގައެވެ.
ރައީސް މުޢިއްޒު ވިދާޅުވި ގޮތުގައި، މި ސަރުކާރުން އަންނަނީ ކުރީގެ ސަރުކާރުތަކުން ނަގާފައިވާ ބޮޑެތި ދަރަނިތައް ދައްކަމުންނެވެ. އެގޮތުން ވޭތުވެދިޔަ 40 ދުވަހުގެ ތެރޭގައި އެކަނިވެސް ޖުމްލަ 974 މިލިއަން ޑޮލަރު ދައްކާފައިވާކަން ރައީސް ފާހަގަކުރެއްވިއެވެ. މީގެ ތެރޭގައި 524 މިލިއަން ޑޮލަރުގެ ސުކޫކާއި، 400 މިލިއަން ޑޮލަރުގެ ކަރަންސީ ސްވޮޕްގެ އިތުރުން މިއަދު ދެއްކި 50 މިލިއަން ޑޮލަރު ހިމެނެއެވެ.
އިންޑިއާއިން ނަގާފައިވާ 150 މިލިއަން ޑޮލަރުގެ ލޯނުގެ ތަފްސީލް ހާމަކުރައްވަމުން ރައީސް ވިދާޅުވީ، އެމްޑީޕީ ސަރުކާރުން 2019 ވަނަ އަހަރު ތިން ފަހަރެއްގެ މަތިން 50 މިލިއަން ޑޮލަރުގެ ލޯނު ނަގާފައިވާ ކަމަށެވެ. އެއީ މާޗް 17، ޖޫން 26 އަދި އޮކްޓޯބަރު 1، 2019 ގައެވެ. މި ދަރަނިތައް ނިމިދިޔަ ސަރުކާރުން ކޮންމެ އަހަރަކުވެސް އައީ ދައްކައި ޚަލާސްކުރުމުގެ ބަދަލުގައި ”ރޯލްއޯވަރ“ ކުރަމުންނެވެ.
”އާދެ އަޅުގަނޑުމެން މިއަންނަނީ މީގެކުރީގެ ސަރުކާރުތަކުން ނަގާފައިހުރި ދަރަނިތައް ދައްކަމުން. އެހެންވީމަ އެގޮތުން ބަލާއިރުގަ މިއަދާ ހަމަޔަށް އައިއިރުގަ އަޅުގަނޑުމެން ސުކޫކު ދައްކައިފިން 524 މިލިއަން ޑޮލަރު އަދި 400 މިލިއަންގެ ސްވޮޕް ޕޭކޮށްފިން .އަދި މިއަދަށް ޑިއުވެފައޮތް 50 މިލިއަން ޑޮލަރުގެ ލޯނުވެސް އަޅުގަނޑުމެން ޕޭކޮށްފިން 11 މެއިގަަ ޕޭ ކުރާގޮތަށް މިދިޔަ ސަރުކާރުން ނަގާއިފައިއޮތް 50 މިލިއަން ޑޮލަރު. އެއީ 17 މާޗް 2019 ނެގި 50 މިލިއަން ޑޮލަރު، 26 ޖޫން 2019 ގައި ނެގި 50 މިލިއަން ޑޮލަރު އަދި 1 އޮކްޓޯބަރު 2019 ގައި ނެގި 50 މިލިއަން ޑޮލަރު.. މިސަރުކާރު ފެށިގެން މީގެ ތެރެއިން އެއް 50 މިލިއަން ޑޮލަރު އަޅުގަނޑުމެން ސެޓްލް ކުރިން 7 ޖެނުއަރީ 2024 ގައި، މިއަދު ޕޭކުރަން އޮތް 50 މި ޕޭކުރީ“ ރައީސް ވިދާޅުވިއެވެ.
މި ސަރުކާރުން މިހާތަނަށް ވަނީ އިންޑިއާގެ މި ދަރަނީގެ ތެރެއިން 100 މިލިއަން ޑޮލަރު ދައްކާފައެވެ. އެއީ މިއަހަރުގެ ޖެނުއަރީ 7 ގައި ދެއްކި 50 މިލިއަން ޑޮލަރާއި މިއަދު ދެއްކި 50 މިލިއަން ޑޮލަރެވެ. ބާކީ އޮތް 50 މިލިއަން ޑޮލަރު އަންނަ ސެޕްޓެމްބަރު 17 ގައި ދައްކާ އެއްކޮށް ޚަލާސްކުރައްވާނެ ކަމުގެ ޔަގީންކަން ރައީސް ދެއްވިއެވެ.
”މިއީ މިދިޔަ ސަރުކާރުން ރައްޔިތުންގެ ބޮލުގައި އަޅުވާފައިވާ ދަރަނި ދަންތުރައެއް. މި ’ޑެޓް ޓްރެޕް‘ އިން އަޅުގަނޑުމެން މިދަނީ ރައްޔިތުން ސަލާމަތްކުރަމުން،“ ރައީސް ވިދާޅުވިއެވެ.
ރައީސްގެ ވާހަކަފުޅުގައި، ދައުލަތުގެ މަތީ މަގާމުތައް އަދާކުރައްވާފައިވާ ބައެއް ބޭފުޅުން ރާއްޖޭގެ އިގްތިސާދާ މެދު ހަގީގަތެއް ނެތް ވާހަކަތައް ފަތުރާތީ އެކަމާ ހިތާމަކުރައްވާ ކަމަށް ވިދާޅުވިއެވެ. އަދި ބޮޑެތި ދަރަނިތައް ދައްކަމުންދާއިރުވެސް، މުވައްޒަފުންގެ މުސާރައާއި، ތެލުގެ ޚަރަދާއި، ކާޑުގެ ބާވަތްތަކުގެ އަގު ހިފެހެއްޓުމުގެ އިތުރުން ބޭރުގައި ކިޔަވާ ކުދިންނަށް ފޮނުވަންޖެހޭ ފައިސާވެސް މެދުނުކެނޑި ދައްކަމުންދާނެ ކަމަށް ރައީސް ވިދާޅުވިއެވެ.
މި މަސައްކަތަކީ ރައްޔިތުންގެ ބޮލުގައި އެޅިފައިވާ ދަރަނި ފިލުވައި، ގައުމުގެ މުސްތަގުބަލު އުޖާލާކުރުމަށް ކުރާ މަސައްކަތެއް ކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.
