ކުރީގެ ރައީސް މުހައްމަދު ނަޝީދާއި އެހެން ދުނިޔޭގެ ބައެއް ލީޑަރުންގެ ނަން ބޭނުންކޮށްގެން ޕްރޮމޯޓުކުރުމަށް ފަށާފައިވާ ކޮމަންވެލްތު ޔުނިއަން ބްލޮކްޗެއިން ނެޓްވޯކް (ސީޑަބްލިއުޔޫ) ކްރިޕްޓޯ ޓޯކަންއަކީ ބޮޑު އޮޅުވާލުމެއްގެ ތެރެއިން ހިންގާ ސްކޭމެއް ކަމަށް ތުހުމަތުކޮށްފިއެވެ.
ހީލަތްތެރިކަމާއިއެކު ނަން ކޮމަންވެލްތާ ގުޅުވައިގެން ހިންގާ މި ”ސްކޭމް“ ކްރިޕްޓޯ ކަރަންސީ ޓޯކަންގެ ޖުމްލަ ސަޕްލައިގެ 73.13 އިންސައްތަ ކޮންޓްރޯލުކުރަނީ ލޯންޗުކުރި ވަގުތު އެންމެ ސިކުންތެއްގެ ތެރޭގައި ހަދާފައިވާ 195 ވޮލެޓުންނެވެ.
މިއީ އެއްފަރާތުގެ ކޮންޓްރޯލްގެ ދަށުގައި ޓޯކަންތައް ހިފަހައްޓާފައި ފަހުން އިންވެސްޓަރުންގެ ފައިސާއާއެކު ފިލުމަށް މިފަދަ ސްކޭމްތައް ހިންގާ ފަރާތްތަކުން ބޭނުންކުރާ އުކުޅެކެވެ.
މި ކްރިޕްޓޯ ކަރަންސީގައި ބައިވެރިވުން އޮތްކަމަށް ދެއްކި އަލިފްދާލުގެ ޖެނެރަލް އެސެމްބްލީގެ ކުރީގެ ރައީސް އަބްދު الله ޝާހިދު އަދި މޮރީޝަސްގެ ކުރީގެ ރައީސާ އަމީނާ ގުރިބް-ފަކީމް ވަނީ ސީޑަބްލިއުޔޫ ކަރަންސީގައި އެމީހުން ބައިވެރިވުމެއް ނެތްކަމަށް ބުނެފައެވެ.
ރައީސް ނަޝީދުގެ ބަހެއް ހޯދަން ކުރި މަސައްކަތް އަދި މިހާތަނަށް ނާކާމިޔާބު ވެފައިވާއިރު، އެފަދަ ދުނިޔެއަށް ލޯހުޅުވިފައިވާ ކަމަށް ގިނަ ބަޔަކު ބުނާ ޝަހުސިއްޔަތެއް މިފަދަ ސްކޭމެއްގައި ޖެހި އެހެންފަރާތްތަކަށް މި ފެތުރުމަކީ، ރައީސް ނަޝީދަށް އިތުބާރުކުރާ އަދި އެހެން ނޫންވެސް އާއްމު ގިނަ ބަޔަކަށް މާލީގޮތުން ބޮޑެތި ގެއްލުންތަކެއް ލިބިދާނެކަމެއް ކަމަށް ބުނެ ގިނަ ބަޔަކު ދަނީ ނުރުހުން ފާޅުކުރަމުންނެވެ.
