ގއ. ވިލިގިލީގައި ފުލުހުންގެ ބަންދުގައި ހުރި މީހަކު، އެ ރަށުގައި ހުންނަ ގއ. އަތޮޅު ހޮސްޕިޓަލުގައި އެޑްމިޓްކޮށްގެން ފަރުވާދެމުން ދަނިކޮށް މިއަދު ފިލައިފިއެވެ.
ފުލުހުންގެ އިދާރާއިން މައުލޫމާތު ދީފައިވާ ގޮތުގައި، މި ހާދިސާ ހިނގާފައިވަނީ 2026 މެއި 8 ވާ ހުކުރު ދުވަހުގެރޭގެ ވަގުތެއްގައެވެ. ބަންދުގައި ހުރި އެ މީހާ ފިލާފައިވަނީ ބަލިވެގެން ހޮސްޕިޓަލުގައި ފަރުވާ ދެމުން ދަނިކޮށް، ފުލުހުންގެ ސަމާލުކަމުން ނެއްޓިގެންނެވެ. ނަމަވެސް، އެ މީހާ ފިލިތާ މާގިނަ އިރުތަކެއް ނުވަނީސް ފުލުހުން ކުރި މަސައްކަތުން އޭނާ މިހާރު ވަނީ އަލުން ފުލުހުންގެ ބެލުމުގެ ދަށަށް ގެނެސްފައެވެ. އޭނާ ހޯދާފައިވަނީ ވިލިގިލީގެ ތެރެއިންނެވެ.
މި ހާދިސާއާ ގުޅިގެން ބަލަންޖެހޭ ކަންކަމާއި، އެ މީހާ ފިލަން މެދުވެރިވި ސަބަބު ފުލުހުން ދަނީ އިތުރަށް ތަހުގީގު ކުރަމުންނެވެ. އެހެންނަމަވެސް، އެއީ ކޮން މައްސަލައެއްގައި ބަންދުކޮށްފައި ހުރި މީހެއްކަމެއް ފުލުހުން ހާމަކޮށްފައެއް ނުވެއެވެ.
