ދުނިޔޭގެ އެކި ކަންކޮޅުތަކުން ފަސިންޖަރުން އުފުލި ކްރޫޒް ޝިޕެއްގައި ހެންޓާވައިރަސް ފެތުރެމުންދާ ދިއުމަކީ ކަމާބެހޭ ފަރާތްތަކުން ނުހަނު ސީރިއަސްކޮށް ބަލަމުންދާ ކަމެއް ކަމަށް އެފަރާތްތަކުން ބުނެފިއެވެ.
މީގެ މަހެއްހާ ދުވަސް ކުރިން އާޖެންޓީނާއިން ފުރި މި އުޅަނދުގައި ދަތުރުކުރަނިކޮސް ނުވަތަ އެ އުޅަނދުން ދަތުރުކުރުމަށްފަހު ތިން ފަސިންޖަރަކު މިހާތަނަށް ވަނީ މަރުވެފައެވެ. މީގެ އިތުރުން، އިތުރު ހަތަރު މީހަކަށް ފަރުވާ ދިނުމަށްޓަކައި ވަނީ ކުއްލި ހާލަތުގައި އުޅަނދުން ބާލާފައެވެ.
މި ވައިރަހަށް ހުށަހެޅިފައިވުން އެކަށީގެންވާ މީހުން ދެނެގަތުމަށްޓަކައި ބޮޑު އޮޕަރޭޝަނެއް މިހާރު ދަނީ ހިންގަމުންނެވެ. އޭގެ ތެރޭގައި މިހާރު ފްލައިޓްތަކުގައި އެނބުރި ގައުމަށް ގޮސްފައިވާ މީހުންވެސް މޮނީޓަރ ކުރުން ހިމެނެއެވެ. އޭގެ ތެރޭގައި އިނގިރޭސިވިލާތް، ދެކުނު އެފްރިކާ، ނެދަލޭންޑްސް، އެމެރިކާ އަދި ސްވިޒަލޭންޑުގެ މީހުން ހިމެނެއެވެ.
ބުރާސްފަތި ދުވަހު ދީފައިވާ އަޕްޑޭޓެއްގައި، ދުނިޔޭގެ ސިއްހަތު ޖަމްއިއްޔާ، ޑަބްލިއުއެޗްއޯގެ ޑޮކްޓަރު މާރިއާ ވެން ކާކޯވް ބުނެފައިވަނީ މިއީ އާލަމީ ވަބާއެއްގެ ފެށުން ނޫން ކަމަށެވެ. ”މިއީ ކޮވިޑެއް ނޫން، މިއީ އިންފްލުއެންޒާއެއްވެސް ނޫން، މިއީ ފެތުރޭ ގޮތް މާ ތަފާތު އެއްޗެއް،“ އޭނާ ބުނެފައި ވެއެވެ.
ހިމަބިހި ފަދަ ވަރަށް ފަސޭހައިން ގައިން ގަޔަށް އަރާ ބަލިތަކާ ހިލާފަށް، މި ފެތުރުމުގެ ފަހަތުގައިވާ ”އެންޑީސް ސްޓްރެއިން“ ގެ ހެންޓާވައިރަސް އެހާ ބާރަށް ފެތުރޭ އެއްޗެއް ނޫނެވެ. އިންސާނުންގެ ފަރާތުން އިންސާނުންގެ ގަޔަށް ބަލި އެރުމަކީ އެކަށީގެންވާ ކަމެއް ނަމަވެސް، ދުނިޔޭގެ ފެންވަރުގައި މި ބަލި ފެތުރުމުގެ ނުރައްކާ އޮތީ ވަރަށް ކުޑަކޮށް ކަމަށް ޑަބްލިއުއެޗްއޯ އިން ބުނެއެވެ.
