މިހާތަނަށް 233 އާރްޓީއައިއަށް ރައީސުލްޖުމްހޫރިއްޔާގެ އޮފީހުން ޖަވާބުދީފައިވާ ކަމަށް އެ އޮފީހުގެ އިސް ތަރުޖަމާނު މުޙައްމަދު ޙުސައިން ޝަރީފް (މުންދު) މިއަދު ވިދާޅުވެއްޖެއެވެ.
މުންދު މި މޭރުމުން ވިދާޅުވީ، ޕްރެސަރ ވިތް ސްޕޮކްސްގެ ނަމުގައި ޓެލެވިޒަން މޯލްޑިވްސްގައި މިއަދު ކުރިއަށްގެންދިޔަ ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުންނެވެ. ނޫސްވެރިންގެ ސުވާލުތަކަށް ޖަވާބުދެއްވަމުން މުންދު ވަނީ މިކަމާ ގުޅިގެން ދިމާވާ ބައެއް ގޮންޖެހުންތަކަށް އަލިއަޅުއްވާލައްވައިފައެވެ.
އެގޮތުން، ގިނަ ފަހަރަށް އާރްޓީއައި ހުށަހަޅާ ފަރާތް ނޭނގޭ ގޮތަށް އާރްޓީއައި ހުށަހެޅުމާއި، މައުލޫމާތު ހޯދަން ބޭނުންވާ މުއައްސަސާ ނޫން އެހެން މުއައްސަސާތަކަށް ހުށަހެޅުންތައް ފޮނުވަމުންދާކަން ފާހަގަކުރައްވަމުން މުންދު ވިދާޅުވީ، މިކަމުގެ ސަބަބުން މައުލޫމާތު ފޯރުކޮށްދިނުމުގައި ބޮޑެތި ދަތިތަކާއި ކުރިމަތިވާ ކަމަށެވެ.
ރައީސުލްޖުމްހޫރިއްޔާގެ އޮފީހަށް ހުށަހަޅާފައިވާ އާރްޓީއައިތަކުގެ ތަފްސީލު ހިއްސާކުރައްވަމުން މުންދު ވިދާޅުވީ، 2023 ވަނަ އަހަރުގެ ޑިސެމްބަރު 31 ވަނަ ދުވަހުން ފެށިގެން މި މަހުގެ ފުރަތަމަ ދުވަހުގެ ނިޔަލަށް ޖުމުލަ 180 އާރްޓީއައި ހުށަހަޅާފައިވާ ކަމަށާއި އޭގެ ތެރެއިން 170 ހުށަހެޅުމަކަށް ޖަވާބުދީފައިވާ ކަމަށެވެެ. މީގެ އިތުރުން، މި އަހަރުގެ ޖަނަވަރީ މަހުގެ ފުރަތަމަ ދުވަހުން ފެށިގެން އަހަރުގެ މިހާތަނަށް ލިބުނު 106 އާރްޓީއައިގެ ތެރެއިން 63 ހުށަހެޅުމަކަށް ވެސް ޖަވާބުދީފައިވާ އޭނާ ވިދާޅުވިއެވެ.
ޖަވާބު ނުދެވި އޮތް 55 އާރްޓީއައިތަކުގެ ތެރޭގައި، މިހާރު މައުލޫމާތު އެއްކުރަމުންދާ އަދި ވަގުތުން ޖަވާބު ދިނުމަށް ދަތި ހުށަހެޅުންތައް ހިމެނޭކަން ފާހަގަކުރައްވަމުން މުންދު ވިދާޅުވީ، އެފަދަ، ބައެއް މައުލޫމާތުތައް ހާމަކުރަން ދަތިވަނީ ހާރިޖީ ގުޅުންތަކަށް ބުރޫއަރާފާނެ ފަދަ ނުވަތަ މާލީ އެއްބަސްވުންތަކުގައި ހިމެނޭ ސިއްރު ހިފެހެއްޓުމުގެ މާއްދާތަކާ ގުޅުންހުރި ނުވަތަ ގައުމީ ސަލާމަތަށް ނުރައްކާވެދާނެ ފަދަ މައުލޫމާތުތަކެއް ހިމެނޭތީ ކަމަށެވެ.
މުންދު އިތުރަށް ވިދާޅުވީ، ބައެއް މައުލޫމާތުތަކަކީ ދޫކުރެވެން ނެތް މައުލޫމާތު ނަމަވެސް، އޭގެ ތެރޭގައި ހިއްސާކުރެވޭނެ މައުލޫމާތައް ވެސް ހިމެނޭނެ ކަމަށާއި އެފަދަ މައުލޫމާތުތައް ހިއްސާކުރަމުންދާނެ ކަމަށެވެ.
