ރާއްޖޭގައި އަލަށް ފެށި ބަންކަރިންގެ ޚިދުމަތުން މިހާތަނަށް ލިބުނު އާމްދަނީ ބިލިޔަނަކާ ގާތްކުރާ އަދަދަކަށް އިތުރުވެފައިވާކަން ސަރުކާރުން ހާމަކޮށްފިއެވެ. މިކަން ހާމަކުރެއްވީ އިޤްތިޞާދީ ތަރައްޤީއާއި ދަތުރުފަތުރާއި ވިޔަފާރިއާ ބެހޭ ވަޒީރު މުޙައްމަދު ސަޢީދު، ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައެވެ.
ވަޒީރު ސަޢީދު ވިދާޅުވި ގޮތުގައި، 2024 ވަނަ އަހަރުގެ ސެޕްޓެންބަރު މަހު ފެށި މި ޚިދުމަތުން މިދިޔަ މަހުގެ ނިޔަލަށް ރާއްޖެއަށް ވަނީ 923.46 މިލިޔަން ރުފިޔާގެ އާމްދަނީއެއް ލިބިފައެވެ.
”30 އެޕްރީލް 2026 އާއި ހަމައަށް ލިބުނު އާމްދަނީއަށް ބަލާއިރު ގާތްގަނޑަކަށް 1 ބިލިޔަން ރުފިޔާއާއި ހަމައަށް އާމްދަނީ އެ އަރަނީ. ބަނދަރެއް ނެތި އޮފްޝޯކޮށް ފެށުނު މި މަސައްކަތުން މިހާ ބޮޑު ކުރިއެރުމެއް ލިބުމަކީ އިޤްތިޞާދަށް ލިބުނު ބޮޑު ކާމިޔާބީއެއް،“ ވަޒީރު ވިދާޅުވިއެވެ.
މި ޚިދުމަތަކީ ރައީސް މުޢިއްޒު އިބްރާހީމްގެ ސަރުކާރުން ރާއްޖޭގެ އިޤްތިޞާދު ސިންދަފާތުކޮށް، ފަތުރުވެރިކަމަށް އެކަނި ބަރޯސާވުން ކުޑަކުރުމަށް ފެށި މުހިންމު މަސައްކަތެކެވެ. އެސްޓީއޯ މެދުވެރިކޮށް ދޭ މި ޚިދުމަތުގައި ބޭނުންކުރާ ތެލުގެ 90 އިންސައްތައަކީ ރާއްޖެއަށް މުޅިން އަލަށް އެތެރެކުރާ ތެލެވެ. އޭގެ ތެރޭގައި އެންމެ ބޮޑު ހިއްސާއެއް އޮތީ އަލަށް ތަޢާރަފްކުރި ’ލޯ ސަލްފަރ އޮއިލް‘ ގައެވެ.
ބަންކަރިން ޚިދުމަތުގެ ސަބަބުން އެސްޓީއޯގެ މާލީ ހާލަތަށްވެސް ވަނީ ބޮޑު ކުރިއެރުމެއް ލިބިފައެވެ. އެ ކުންފުނީގެ މިއަހަރުގެ ފުރަތަމަ ކުއާޓަރުގެ ރިޕޯޓް ދައްކާގޮތުން 5.49 ބިލިޔަން ރުފިޔާގެ އާމްދަނީއެއް ލިބިފައިވާއިރު، މީގެ ތެރެއިން ތެލުގެ ވިޔަފާރި ވަނީ ނިމިދިޔަ އަހަރުގެ ފަހު ކުއާޓަރާ އަޅާބަލާއިރު 27 އިންސައްތަ އިތުރުވެފައެވެ. އެސްޓީއޯއިން ފާހަގަކުރި ގޮތުގައި، ފުރަތަމަ ކުއާޓަރުގައި ބަންކަރިންގެ ތެރެއިން ވިއްކި ތެލުގެ މިންވަރު ވަނީ 18 މިލިޔަން ލީޓަރަށްވުރެ އިތުރުވެފައެވެ.
މި ޚިދުމަތް ރާއްޖޭގައި ކުރިއަށްގެންދަނީ ބައިނަލްއަޤްވާމީ ގޮތުން މި ދާއިރާގައި ނަން މަޝްހޫރު ވިޓޯލް ކުންފުންޏާ ގުޅިގެންނެވެ. ސަރުކާރުގެ އަމާޒަކީ މި މަސައްކަތް އިތުރަށް ހަރުދަނާކޮށް، ދިވެހިރާއްޖެއަކީ ބައިނަލްއަޤްވާމީ ކަނޑުދަތުރުފަތުރުގެ މުހިންމު މަރުކަޒަކަށް ހަދައި، ދައުލަތަށް ވަންނަ އާމްދަނީ އިތުރުކުރުމެވެ.
