ޕާކިސްތާނުގެ އަދި އެހެނިހެން މަޞްދަރުތަކާ ހަވާލާދީ ރޮއިޓާސްއިން ރިޕޯޓްކޮށްފައިވާ ގޮތުގައި، ގަލްފު ސަރަހައްދުގައި ހިނގަމުންދާ ހަނގުރާމަ ހުއްޓާލުމަށްޓަކައި އެއް ސަފުހާގެ މެމޮރަންޑަމަކަށް އައުމަށް އެމެރިކާއާއި އީރާނުން ދަނީ ގާތްވަމުންނެވެ.
މިއަދު ހެނދުނު ސޯޝަލް މީޑިއާގައި ކޮށްފައިވާ ޕޯސްޓެއްގައި، އެމެރިކާގެ ރައީސް ޑޮނާލްޑު ޓުރަމްޕު ވަނީ ވަކި ޚާއްސަ ހުށަހެޅުމެއްގެ ތަފްސީލު ދިނުމެއް ނެތި، ”އެއްބަސްވެފައިވާ ކަންކަމަށް އީރާނުން އަމަލުކުރަން އެއްބަސްވާނަމަ“ ހަނގުރާމަ ނިމުމަކަށް އަތުވެދާނެ ކަމަށް ބުނެފައެވެ. އަދި އެމެރިކާއިން ހޮރްމޫޒް ކަނޑުއޮޅީގައި ފެށި “ޕްރޮޖެކްޓު ފްރީޑަމް“ ވެސް ވަނީ މަޝްވަރާތަކަށް ކަމަށްބުނެ މަޑުޖައްސާލާފައެވެ.
އެމެރިކާގެ މީޑިއާއެއް ކަމަށްވާ ’އެކްސިއޯސް‘ އިން އެންމެ ފުރަތަމަ ރިޕޯޓްކުރި މި މަޢުލޫމާތު މަސްދަރުތަކުން ވަނީ ކަށަވަރުކޮށްދީފައެވެ. ހުށަހެޅިފައިވާ 14 ނުކުތާގެ، އެއް ސަފުހާގެ މި މެމޮރަންޑަމްގެ ދަށުން ރަސްމީކޮށް ހަނގުރާމަ ނިމުމަކަށް އަންނާނެއެވެ. އޭގެ ފަހުން ހޮރްމޫޒް ކަނޑުއޮޅިން ދަތުރުފަތުރު ކުރުމަށް ހުރި ހުރަސްތައް ނައްތާލުމަށާއި، އީރާނާ ދެކޮޅަށް އެމެރިކާއިން އަޅާފައިވާ ދަތިކުރުމުގެ ފިޔަވަޅުތައް އުވާލުމަށާއި، އަދި އީރާނުގެ ނިއުކްލިއާ ޕްރޮގްރާމް ކޮންޓްރޯލް ކުރުމާ ގުޅޭގޮތުން މަޝްވަރާތައް ކުރިއަށްދާނެއެވެ.
