މީގެ ފަސް އަހަރު ކުރިން 2021 ވަނަ އަހަރު، ކުރީގެ ރައީސް މުޙައްމަދު ނަޝީދަށް އަމާޒުކޮށްދިން ބޮމުގެ ހަމަލާތަކުގައި ހަށިގަނޑަށް ލިބުނު ގެއްލުންތައް މިހާރު އެއްކޮށް ފަސޭހަވެފައިވާ ކަމަށް އެމަނިކުފާނު ވިދާޅުވެއްޖެއެވެ.
އެ ހަމަލާއަށް ފަސް އަހަރު ފުރުމާއި ގުޅިގެން މީސް މީޑިއާގައި ހިއްސާކުރެއްވި ޕޯސްޓެއްގައި ނަޝީދު ވިދާޅުވީ، ހަމަލާގައި ހަށިގަނޑަށް ލިބުނު ގެއްލުންތައް ފަސް އަހަރުދުވަހުގެ ތެރޭގައި އެއްކޮށް ފަަސޭހަވާނެ ކަމަށް ފަރުވާ ދެއްވި ޑޮކްޓަރުުން ވިދާޅުވި ކަމަށެވެ. އަދި އެގޮތަށް އެކަން މެދުވެރިވެފައިވާތީ މާތްﷲ ޝުކުރުވެރިވާ ކަމަށް ނަޝީދު ވަނީ ވިދާޅުވެފައެވެ.
When I was recovering from the bomb attack, which happened 5 years ago today, my doctors told me “in 5 year’s time you’ll be fully recovered and will only have to worry about movement in 3 fingers of your right hand.” They were correct in their prediction. I thank Almighty Allah… pic.twitter.com/8RtRuRRPb3
— Mohamed Nasheed (@MohamedNasheed) May 6, 2026
2021 ވަނަ އަހަރުގެ މެއި މަހުގެ ހަވަނަ ދުވަހު ނަޝީދަށް އަމާޒުކޮށް ދިން މި ހަމަލާއާއި ގުޅިގެން ހަ މީހެއްގެ މައްޗަށް ދައުވާކޮށްފައިވެއެވެ. އެ މީހުންނަކީ:
- އިސްޙާޤު، މއ. ކުދެހިގެ / ކ. މާލެ
- މުޖާޒު އަޙްމަދު، މއ. ފޭރުގެ / ކ. މާލެ
- ތަހުމީން އަޙްމަދު، ފޮޅޭމާ / ގއ. ކޮނޑޭ
- ޢަލީ ހައިޝަމް، ނޫރީގެ / ނ. މަނަދޫ
- ފަހުމީ ޢަލީ، ހުދުރުވާގެ / ގއ. ވިލިނގިލި
- މުޙައްމަދު ނާޒިމް، އަސަރީގެ / އއ. މާޅޮސް
މި ހަމަލާ ދިނުމުގައި އަމަލީ ގޮތުން ބައިވެރިވި އަޙްމަދު އަދުހަމް ކުށަށް އިއުތިރާފްވެފައިވާތީ އޭނާގެ މައްޗަށް ވަނީ 23 އަހަރުގެ ޖަލު ހުކުމެއް އިއްވައިފައެވެ.
މި ހަމަލާއާ ގުޅިގެން އޭޑީކޭ ހޮސްޕިޓަލުން އަދި ރާއްޖެއިން ބޭރުން ވެސް ނަޝީދު ފަރުވާ ހޯއްދެވިއެވެ. މީގެ އިތުރުން ފުރާނަ ސަލާމަތްކުރުމަށްޓަކައި ބޮޑެތި އޮޕަރޭޝަންތަކެއް ކުރަންޖެހުނުކަން ފާހަގަކުރައްވަމުން އޭޑީކޭ ހޮސްޕިޓަލުގެ ޑޮކްޓަރު ޢަބްދުﷲ ނިޔާފް ވިދާޅުވީ، ނަޝީދަށް ފަރުވާދެމުން ދަނިކޮށް އެމަނިކުފާނުގެ ވިންދު ވެސް ހުއްޓުނު ކަމަށެވެ.
