ވިހެއުމާއި ގުޅިގެން ލިބޭ ޗުއްޓީ ނެގުމުގެ ސަބަބުން، މުވައްޒަފުންނަށް ވަޒީފާގެ ކުރިއެރުން ނުލިބޭ މައްސަލައާއި ގުޅިގެން ރައްޔިތުންގެ މަޖިލީހަށް ސިވިލް ސަރވިސް ކޮމިޝަން ހާޒިރުކޮށް، އެ ކޮމިޝަނާ ސުވާލުކުރުމަށް ނިންމައިފިއެވެ.
ރައްޔިތުންގެ މަޖިލީހަށް ސިވިލް ސަރވިސް ކޮމިޝަން ހާޒިރުކޮށް ސުވާލުކުރަން ނިންމާފައި މިވަނީ، ވިހެއުމާއި ގުޅިގެން ލިބޭ ހަމަސްދުވަހުގެ ޗުއްޓީ ނެގުމުގެ ސަބަބުން، މުވައްޒަފުންނަށް ވަޒީފާގެ ކުރިއެރުން ލިބުމުގައި ހުރަސްތަކެއް ކުރިމަތިވާތީ ނުވަތަ ވަޒީފާގެ ކުރިއެރުން ނުލިބޭތީ މަޖިލީހުގެ ޕެޓިޝަން ކޮމިޓީއަށް ހުށަހަޅާފައިވާ ޕެޓިޝަނަކާއި ގުޅިގެންނެވެ.
ޕެޓިޝަން ކޮމިޓީން މިއަދު ބޭއްވި ބައްދަލުވުމުގައި މަޑަވެލި ދާއިރާގެ މެންބަރު މުޙައްމަދު ޝަމީޒު ވަނީ، ސިވިލް ސަރވިސް ވަޒީފާ އަދާކުރާ މުވައްޒަފުން ހަމަސްދުވަހުގެ ޗުއްޓީއެއް ނެގުމުން، ވަޒީފާގެ ކުރިއެރުން ނުލިބޭ މައްސަލައަކީ އިންތިހާއަށް ކަންބޮޑުވާ މައްސަލައެއްކަން ފާހަގަކުރައްވައިފައެވެ. އެހެންކަމުން މިކަމުގައި ސިވިލް ސަރވިސް ކޮމިޝަން ހާޒިރުކޮށްގެން އެ މުއައްސަސާގެ ބަހެއް ހޯދަން މެންބަރު ޝަމީޒް ވަނީ ހުށަހަޅުއްވައިފައެވެ.
މެންބަރު ޝަމީޒުގެ މި ހުށަހެޅުއްވުން ކޮމިޓީ ބައްދަލުވުމުގައި ބައިވެރިވި މެންބަރުންގެ އަގުލަބިއްޔަތުން ވަނީ ފާސްވެފައެވެ.
މިއަދު ބޭއްވި ކޮމިޓީގެ ބައްދަލުވުމުގައި ބައިވެރިވެވަޑައިގަތީ ހަތް މެންބަރެކެވެ. މި ހަތް މެންބަރުން ވެސް ވަނީ ރައްޔިތުންގެ މަޖިލީހަށް ސިވިލް ސާވިސް ކޮމިޝަން ހާޒިރުކޮށްގެން މިކަމާ ގުޅޭގޮތުން ސުވާލުކުރުމަށް ފެންނަ ކަމަށް ވޯޓުދީފައެވެ.
