މޯލްޑިވްސް އިމިގްރޭޝަނުން އެއްވެސް ފަރާތެއްގެ ޒާތީ މައުލޫމާތު ބޭންކް އޮފް މޯލްޑިވްސް (ބީއެމްއެލް) އާއި ހިއްސާނުކުރާ ކަމުގެ ޔަގީންކަން އެ ބޭންކުން ދީފިއެވެ.
ބީއެމްއެލްއިން މި މޭރުމުން ބުނެފައިވަނީ، ސިސްޓަމްގެ ރައްކާތެރިކަން އިތުރަށް ހަރުދަނާކުރުމުގެ މަގުސަދުގައި، އެ ބޭންކުން އިމިގްރޭޝަނާއެކު ސްޓްރެޓީޖިކް ޑިޖިޓަލް ޕާޓްނަރޝިޕެއް ގާއިމްކޮށް އަމަލުކުރަން ފަށާފައިވާކަން ހާމަކޮށްފައިވަނިކޮށް، އެ ބޭންކާއި ގުޅޭގޮތުން ބައެއް ފަރާތްތަކުން ދައްކަމުން އަންނަ ވާހަކަތައް ދޮގުކުރަމުންނެވެ.
އެ ފަރާތްތަކުން ދައްކަމުން އަންނަ ވާހަކަތައް ދޮގުކޮށް މީސް މީޑިއާގައި ހިއްސާކުރި ޕޯސްޓެއްގައި ބީއެމްއެލްއިން ބުނެފައިވަނީ، އިމިގްރޭޝަނުން އެ ބޭންކަށް އެއްވެސް ކަސްޓަމަރެއްގެ އަމިއްލަ މައުލޫމާތު ނުލިބޭ ކަމަށެވެ. އަދި މި ނިޒާމު މެދުވެރިކޮށް ކަށަވަރުކޮށްދެނީ، ރާއްޖެއިން ބޭރުގައި މުއާމަލާތެއް ކުރާ ވަގުތު ކަސްޓަމަރަކީ ރާއްޖެއިން ބޭރުގައި ހުރި ފަރާތެއްތޯ ނުވަތަ ނޫންތޯ ކަމަށް ބީއެމްއެލްއިން ވަނީ ބުނެފައެވެ.
ބީއެމްއެލްއިން ބުނީ މި ބަދަލު ގެނައުމުގެ މައިގަނޑު މަގުސަދަކީ، މަކަރާއި ހީލަތުން ހިންގާ މާލީ ކުށްތަކުން ކަސްޓަމަރުން ރައްކާތެރިކުރުން ކަމަށެވެ. ވަކިން ހާއްސަކޮށް، ކަސްޓަމަރަކު ރާއްޖޭގައި ހުއްޓައި، ރާއްޖެއިން ބޭރުގައި އެ ކަސްޓަމަރެއްގެ ކާޑު ބޭނުންކުރާ ހާލަތްތަކުން ރައްކާތެރިވުން ކަމަށް އެ ބޭންކުން ވަނީ މައުލޫމާތު ދީފައެވެ.
No data is shared between Immigration and Bank of Maldives pic.twitter.com/8i75JkQyw6
— Bank of Maldives (@bankofmaldives) May 5, 2026
ބީއެމްއެލްއިން ވަނީ މި ބަދަލުގެ ސަބަބުން ކަސްޓަމަރުންނަށް ކުރާނެ އަސަރުތަކަށް ވެސް އަލިއަޅުވާލައިފައެވެ. އެގޮތުން، މުއާމަލާތްތައް ހުއްދަކުރުމަކީ ބެންކިންގ ނިޒާމުގެ ތެރޭގައި އާންމުކޮށް ކުރާ ކަމެއް ކަމަށާއި، މިއީ އަލަށް ބޭންކަކުން ކުރި ކަމެއް ނޫން ކަމަށް ބީއެމްއެލްއިން ވަނީ ބުނެފައެވެ. މީގެ އިތުރުން، ކަސްޓަމަރުންގެ ރައްކާތެރިކަމަށްޓަކައި، ކުރެވޭ މުއާމަލާތްތަކަކީ ސައްހަ މުއާމަލާތްތަކެއްތޯ ބެލުމަކީ ބޭންކުތަކުން އަބަދުވެސް ކުރަންޖެހޭ މަސައްކަތެއް ކަމަށް ވެސް ބީއެމްއެލްއިން ވަނީ ބުނެފައެވެ.
ބީއެމްއެލްއިން އިތުރަށް ބުނެފައިވަނީ، މި ބަދަލާއިއެކު އިތުރަށް ބެލޭނެ ހަމައެކަނި ކަމަކީ، ރާއްޖެއިން ބޭރުގައި، ކާޑު ބޭނުންކޮށްގެން މުއާމަލާތެއް ކުރާ ވަގުތު، ކަސްޓަމަރު ހުރީ ރާއްޖެއިން ބޭރުގައިތޯ އެކަނި ކަމަށާއި އެނޫން އެއްވެސް މައުލޫމާތެއް ނުބެލޭނެ ކަމަށް ބީއެމްއެލްއިން ވަނީ ބުނެފައެވެ.
