އީރާނާއެކު އެއްބަސްވުމެއް އެކުލަވާލުމަށްޓަކައި، ހޮރްމޫޒް ކަނޑުއޮޅީގައި ތާށިވެފައިވާ އުޅަނދުފަހަރަށް މަގުދައްކައިދިނުމަށް އެމެރިކާއިން ފެށި ’ޕްރޮޖެކްޓް ފްރީޑަމް‘ މެދުކަނޑާލަން ނިންމާފައިވާކަން އެމެރިކާގެ ރައީސް ޑޮނާލްޑު ޓްރަމްޕު އިޢުލާނު ކޮށްފިއެވެ. ނަމަވެސް އީރާނުގެ ބަނދަރުތައް ބަންދުކުރުން ކުރިއެކޭވެސް އެއްގޮތަށް ދެމިއޮންނާނެ ކަމަށް އޭނާ ބުނެފައިވެއެވެ.
މިދިޔަ ހޯމަ ދުވަހު ’ޕްރޮޖެކްޓް ފްރީޑަމް‘ ފެށި ނަމަވެސް، ޓްރަމްޕް ބުނެފައި ވަނީ މި ފިޔަވަޅު އެޅީ ”ޕާކިސްތާނާއި އެހެނިހެން ގައުމުތަކުގެ އެދުމުގެ މަތިންނާއި އީރާނާ ދެކޮޅަށް ހިންގި އަސްކަރީ ކެމްޕޭނުގައި ލިބުނު ކާމިޔާބީއަށް ބިނާކޮށް“ ކަމަށެވެ.
އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ އިއްޔެ ވައިޓް ހައުސްގައި ބޭއްވި ނޫސްވެރިންގެ ބައްދަލުވުމެއްގައި ބުނެފައިވަނީ ޞުލްޙަ ޤާއިމުކުރުމަށްޓަކައި އީރާނުގެ ނިއުކްލިއާ ޕްރޮގްރާމާ ގުޅޭގޮތުން ޓްރަމްޕް ހުށަހަޅާފައިވާ ޝަރުތުތަކަށް އީރާނުން އެއްބަސްވާންޖެހޭނެ ކަމަށާއި އަދި ހޮރްމޫޒް ކަނޑުއޮޅި އަލުން ހުޅުވާލުމަށްވެސް އެއްބަސްވާންޖެހޭނެ ކަމަށެވެ.
