ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ އިދާރީ އޮނިގަނޑު ހަރުދަނާކުރުމުގެ ގޮތުން، އެ ޕާޓީގެ ޑެޕިއުޓީ ސެކްރެޓަރީ ޖެނެރަލްގެ މަޤާމަށް މުޙައްމަދު ލަމްޢާން އައްޔަނުކުރައްވައިފިއެވެ.
ޕީއެންސީގެ ފަރާތުން ހާމަކުރި ގޮތުގައި، ލަމްޢާން މި މަޤާމަށް އައްޔަނުކުރެއްވީ ޕާޓީގެ ހިންގުން އިތުރަށް ހަލުވިކޮށް، ސިޔާސީ މަސައްކަތްތައް ވަރުގަދަކުރުމުގެ މަޤްޞަދުގައެވެ. މި އައްޔަނުކުރެއްވުމާ ގުޅިގެން ޕާޓީގެ ލީޑަރޝިޕާއި މެންބަރުންގެ ފަރާތުން ލަމްޢާނަށް ވަނީ އިޚްލާޞްތެރި ތަހުނިޔާއާއި ހޫނު މަރުޙަބާއެއް ދަންނަވާފައެވެ.
ކޮންގްރެސް ޕާޓީގެ ޑެޕިއުޓީ ސެކްރެޓަރީ ޖެނެރަލްގެ މަޤާމަށް މުޙައްމަދު ލަމްޢާން އައްޔަނު ކުރެއްވުމާ ގުޅިގެން، އެމަނިކުފާނަށް އިޚްލާޞްތެރި ތަހުނިޔާއައި މަރުޙަބާއެއް ދަންނަވަން.#DhiveheengeRaajje#CongressPartyMV pic.twitter.com/TzGMjzyPXs
— PNC Secretariat (@pnc_secretariat) May 5, 2026
ލަމްޢާން އަކީ މި ސަރުކާރުގެ އިދާރީ އަދި ހިންގުމުގެ ދާއިރާގައި އިސް މަޤާމުތަކެއް ފުރުއްވަމުން ގެންދަވާ ތަޖުރިބާކާރު ބޭފުޅެކެވެ. އެގޮތުން، މި ސަރުކާރު އައިފަހުން އެމް.އޭ.ސީ.އެލްގެ ޑެޕިއުޓީ މެނޭޖިންގ ޑިރެކްޓަރުގެ މަޤާމު އޭނާ ވަނީ ފުރުއްވާފައެވެ. މީގެ އިތުރުން، މިހާރު ލަމްޢާން އަކީ މޯލްޑިވްސް ޕޯޓްސް ލިމިޓެޑް (އެމް.ޕީ.އެލް) ޑެޕިއުޓީ ސީ.އީ.އޯ އަދި ބޯޑުގެ އެކްޒެކެޓިވް ޑިރެކްޓަރެވެ.
ޕާޓީން ބުނެފައިވަނީ ލަމްޢާން ފަދަ ޤާބިލު އަދި ތަޖުރިބާކާރު ބޭފުޅަކު ސެކްރެޓޭރިއަޓުގެ އިސް މަޤާމަކަށް އައްޔަނުކުރެވުމަކީ ޕާޓީގެ ކުރިމަގަށް ލިބުނު ވަރަށް ބޮޑު ކުރިއެރުމެއް ކަމަށެވެ. ޚާއްޞަކޮށް ސަރުކާރުގެ ސިޔާސަތުތައް ރައްޔިތުންނާ ހަމައަށް ފޯރުކޮށްދިނުމުގައާއި، ޕާޓީގެ އިދާރީ މަސައްކަތްތައް ތަރުތީބުކުރުމުގައި އޭނާގެ ދައުރު ބޮޑުވާނެ ކަމަށް ޕާޓީން ދެކެއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިސްކޮށް ހުންނަވައިގެން ހިންގަވާ ޕީއެންސީއަކީ މިހާރު ރާއްޖޭގެ އެންމެ ބޮޑު ސިޔާސީ ޕާޓީއެވެ. އެ ޕާޓީގެ ޗެއަރޕާސަންގެ މަޤާމު ފުރުއްވަނީ ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ އެވެ. އަދި ތަރުޖަމާނަކަށް ރައީސް އޮފީހުގެ އަންޑަރ ސެކްރެޓަރީގެ މަޤާމްވެސް ފުރުއްވަމުން ގެންދަވާ ފިރުޒުލް އައްޔަނުކޮށްފައިވާއިރު، އެސްޖީއަކަށް އައްޔަނުކުރީ މޫސާ ފަތުހީއެވެ. ޕާޓީގެ ހިންގުމަށް އެގެނެވުނު ބަދަލާއެކު، ކުރިއަށް އޮތް ތަނުގައި ޕާޓީގެ ހަރަކާތްތައް އިތުރަށް ފުޅާވެގެންދާނެ ކަމަށް ޕީއެންސީން ދެކެއެވެ.
