ރާއްޖެއިން ލިބެން ހުންނަ ހުރިހާ ބާވަތެއްގެ ބޭސް އެއްތަނަކުން ލިބޭނެ އިންތިޒާމު ހަމަޖެއްސުމަށް، އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގައި ސަރުކާރުގެ ބޭސް ފިހާރައެއް ތަރައްގީކުރަން ނިންމާފައިވާ ކަމަށް ސަރުކާރުގެ ބޭސް ކުންފުނި، ސްޓޭޓް ފާމަސޫޓިކަލް އެންޑް މެޑިކަލް ސަޕްލައި ކޯޕަރޭޝަން ލިމިޓެޑުގެ މެނޭޖިންގ ޑިރެކްޓަރު ޑރ. ޝާހު މާހިރު ވިދާޅުވެއްޖެއެވެ.
ޑރ. ޝާހު މި މޭރުމުން ވިދާޅުވީ، ރާއްޖެއިން ބޭރުން ބޭސް ގެނައުމުގައި އާންމުންނަށް ދިމާވާ ދަތިތަކާ ގުޅޭ ގޮތުން، ގަލޮޅު އުތުރު ދާއިރާގެ އެމްޑީޕީ މެމްބަރު މުޙައްމަދު އިބްރާހިމް (ކުޑޫ) ރައްޔިތުންގެ މަޖިލީހުގެ ސަރުކާރު ހިއްސާވާ ކުންފުނިތަކާ ބެހޭ ކޮމިޓީ (އެސްއޯއީ ކޮމިޓީ) އަށް ހުށަހަޅުއްވާފައިވާ މައްސަލައަށް ވާހަކަދައްކަވަމުންނެވެ. ޑރ. ޝާހު ވިދާޅުވީ، އަންނަ ހަފުތާގެ ތެރޭގައި އައިޖީއެމްއެޗުގައި ސަރުކާރުގެ ބޭސް ފިހާރަ ތަރައްގީކުރުމުގެ މަސައްކަތް ފެށިގެންދާނެ ކަމަށެވެ.
”އަޅުގަނޑުމެން މި ބަލަނީ ހޮސްޕިޓަލަށް ބޭނުންވާ ބޭސްތައް އެތަނުގައި ބެހެއްޓޭތޯ, ދެން ވަގުތުކޮޅެއް ނަގާނެ މިކަން ސްޓްރީމްލައިން ކުރަން, ހަަމަ ގައިމު ވެސް ރާއްޖެއިން ލިބެންހުރި ހުރިހާ ބޭހެއް އެ ފާމަސީން ލިބޭނެ ގޮތަށް މިހާރު ބައްޓަން ކުރަމުން މިދަނީ،“ – ޑރ. ޝާހު ވިދާޅުވިއެވެ.
ޑރ. ޝާހު ވިދާޅުވީ، އައިޖީއެމްއެޗްގަައި އެޑްމިޓުކޮށްގެން ފަރުވާދޭ ފަރާތްތަކަށް ވެސް ސަރުކާރުގެ ބޭސް ފިހާރައިން ހުރިހާ ބޭހެއް ލިބޭނެގޮތް ފަހިކޮށްދޭނެ ކަމަށެވެ.
ރާއްޖެއިން ބޭސް ލިބުމުގައި ދަތިވާ މައިގަނޑު ސަބަބަކީ ބޭހުގެ ތަފާސްހިސާބުތަކެއް ވަގުތުން ބަލައިލެވޭނެ އިންތިޒާމު ހަމަޖެހިފައި ނުހުންނާތީކަން ފާހަގަކުރައްވަމުން ޑރ. ޝާހު ވިދާޅުވީ، ހުސްވެފައިވާ ބޭސްތަކާއި، ބޭސްތައް ހުރި ތަންތަން އެނގޭނެ ގޮތަށް އެ މައުލޫމާތު ވަގުތުން ބަލާލެވޭނެ ނިޒާމެއް ގާއިމުކުރުމުގެ މަސައްކަތް ކުރަމުން އަންނަ ކަމަށެވެ. މިކަން ކުރެވިއްޖެނަމަ ރާއްޖެއިން ބޭރުން ގެންނަންޖެހޭ ބޭސްތައް ގެނައުން އަވަސްވާނެ ކަމަށް އޭނާ ވަނީ ވިދާޅުވެފައެވެ.
މީގެ އިތުރުން ކޮންމެހެން ބޭނުންވާ ޒަރޫރީ ބޭސްތައް ރާއްޖެއިން ލިބެން ނުހުުންނަ މައްސަލައަކީ، ގައުމީ މައްސަލައެއްގެ ގޮތުގައި ބަލައި ހައްލު ގެންނަންޖެހޭކަން ފާހަގަކުރައްވަމުން ޑރ. ޝާހު ވިދާޅުވީ، އެ މައްސަލަ ވެސް ވަރަށް އަވަހަށް ހައްލުކުރެވިގެންދާނެ ކަމަށާއި އެކަން ހައްލުނުކުރެވެންވީ ސަބަބެއް ނެތް ކަމަށެވެ.
