ޕާކިސްތާނުގެ ކައުންޓަރ ޓެރަރިޒަމް ޑިޕާޓްމަންޓުން ވަނީ ‘އަލްޤާޢިދާ‘ އަށް މީހުން ރެކްރޫޓްކުރާ ކަމުގެ ތުހުމަތުގައި ނޫސްވެރިޔާ އަދި އެކްޓިވިސްޓު މުޙައްމަދު ސަޢްދު ހައްޔަރުކޮށްފައެވެ. އެޑިޕާޓްމަންޓުން ބުނެފައިވަނީ ސަޢްދު ހައްޔަރުކުރީ މިއަހަރުގެ މާރިޗު 27 ވަނަ ދުވަހު ލާހޫރުގެ މަސްޖިދު ޙަނަފިއްޔާ ގޫސިއްޔާގައި މަނާ ލިޔުންތައް ބަހައި، ހަރުކަށި ފިކުރު ފަތުރަމުން ދަނިކޮށެވެ.
ނަމަވެސް ސާދުގެ އާއިލާއިން ބުނާ ގޮތުގައި، މޫނު ނިވާކޮށްގެން ތިބި ހަތިޔާރު އެޅި ބަޔަކު ރޭގަނޑު ވަގުތެއްގައި ލާހޫރުގައި ހުންނަ އޭނާގެ ގެއަށް ވަދެ، އެއްވެސް ކޯޓު އަމުރެއް ނުވަތަ ދައުވާއެއް ނެތި، އަދި ޤާނޫނީ އިޖުރާއަތްތަކާ ޚިލާފަށް އޭނާ ވަނީ ގެންގޮސްފައެވެ.
ޕާކިސްތާނުގެ ކައުންޓަރ ޓެރަރިޒަމް ޑިޕާޓްމަންޓުން ވަނީ ސަޢްދު އަކީ އަލްޤާޢިދާގެ މެންބަރެއް ކަމަށާއި އޭނާ އެ ޖަމާއަތަށް މީހުން އިތުރުކުރަން މަސައްކަތް ކުރި ކަމަށް ބުނެ، އެންޓި-ޓެރަރިޒަމް އެކްޓްގެ ދަށުން އޭނާއާ ދެކޮޅަށް މައްސަލަ ރަޖިސްޓްރީކޮށްފައެވެ.
ސަޢްދު އަންހެނުން، އައިޝާ އަބްދުލް ޤައްޔޫމް ވަނީ ކައުންޓަރ ޓެރަރިޒަމް ޑިޕާޓްމަންޓުން ކޮށްފައިވާ ތުހުމަތުތަކަކީ އެއްވެސް އަސާސެއް ނެތް ތުހުމަތުތަކެއް ކަމަށް ބުނެ އެކަން ދޮގުކޮށްފައެވެ. ސޯޝަލް މީޑިއާގައި އޭނާ ނެރެފައިވާ ބަޔާނެއްގައި ބުނެފައިވަނީ، މި މައްސަލައަކީ ”ޣައިރު ގާނޫނީ އަމަލެއް ކަމަށާއި، އިންސާފުގެ މިންގަނޑުތަކާ ކަނޑައެޅިގެން ޚިލާފު، އަދި ނުބައި ނިޔަތެއްގައި ހިންގާފައިވާ ކަމެއް“ ކަމަށެވެ.
އިއްޔެ ސަޢްދު އެންޓި-ޓެރަރިޒަމް ކޯޓަށް ހާޒިރުކުރެވުނު އިރު، ޕާކިސްތާނުގެ ކައުންޓަރ ޓެރަރިޒަމް ޑިޕާޓްމަންޓާއި ޕްރޮސެކިއުޝަނަށް އިތުރު އެއްވެސް ހެއްކެއް ހުށަހެޅިފައި ނުވާތީ، އޭނާ މިހާރު ވަނީ ޖުޑީޝަލް ރިމާންޑަށް ފޮނުވާލާފައެވެ.
އައިޝާ ކުރި ޓުވީޓެއްގައި ބުނެފައިވަނީ، ”މީގެ ކުރިން ސަޢްދުގެ ފައިގެ އެއްވެސް މައްސަލައެއް ނެތް ނަމަވެސް ކޯޓަށް ހާޒިރުކުރި ވަގުތު އޭނާ ހުރީ ކޮރަމުން ކަމަށާއި ފައިގައި ވަރަށް ބޮޑަށް ރިއްސަމުންދާ ކަމަށެވެ. މީގެ ސަބަބުން ކައުންޓަރ ޓެރަރިޒަމް ޑިޕާޓްމަންޓުގެ އޮފިޝަލުން އޭނާއަށް އަނިޔާކޮށްފައިވާ ކަމުގެ ޝައްކު އުފެދޭ“ ކަމަށެވެ. އަދި ”ސަޢްދުގެ ވާތްފަރާތު އަތުގައި އަނިޔާގެ ނިޝާންތައް ފެންނަން ހުރި“ ކަމަށްވެސް އޭނާ އިތުރަށް ބުނެފައިވެއެވެ.
