ރައްޔިތުންގެ މަޖިލީހުގެ މެންބަރަކަށް ވުމަކީ ނުވަތަ މަޖިލީހުގެ ޗެމްބަރުގެ ތެރޭގައި ހުރުމަކީ އަނެެއް އިންސާނާގެ އަބުރަށް އަރައިގަތުމަށް ލިބޭ ލައިސަންސެއް ނޫން ކަމަށް ރައްޔިތުންގެ މަޖިލީހުގެ ހޯރަފުށީ ދާއިރާގެ މެންބަރު އަލީ މޫސާ ވިދާޅުވެއްޖެއެވެ.
މިއަދު ބޭއްވުނު ރައްޔިތުންގެ މަޖިލީހުގެ ޖަލްސާގައި ވާހަކަދެއްކެވި މެންބަރު އަލީ މޫސާ ވިދާޅުވީ، މަޖިލީހުގެ ގަވާއިދަށް ނުވަތަ ގާނޫނު އަސާސީއަށް އިސްލާހު ގެނެސްގެން ނަމަވެސް، މަޖިލިސް ޗެމްބަރު ތެރޭގައި މީހެއްގެ އަބުރަށް އަރައިގަންނަ މެންބަރުންނާ މެދު ޖިނާއީ ދައުވާ ކުރެވޭނެ ނިޒާމެއް ގާއިމުކުރަން ޖެހޭ ކަމަށެވެ.
”އަޅުގަނޑުމެންނަކީ އިސްލާމުން ކަމަށް ވެފައި، އިސްލާމްދީނުގެ ހަމަތައް ގަބޫލުކުރާ ބަޔަކަށް ވާހިނދު، އިސްލާމްދީނުގެ ހަމަތަކާއި ގާނޫނުތަކާއި އުސޫލުތަކަށް އަޅުގަނޑުމެން ތަބާވާން ޖެހޭނެ. ދިވެހިރާއްޖޭގެ ގާނޫނުއަސާސީން ލިބިދޭ ވާހަކަދެއްކުމުގެ މިނިވަންކަމަކީ އެހެން މީހުންގެ އަބުރަށް އަރައިގަތުމަށް އޮތް ފުރުސަތެއް ނޫން،“ އަލީ މޫސާ ވިދާޅުވިއެވެ.
އޭނާ އިތުރަށް ފާހަގަކުރެއްވި ގޮތުގައި، މަޖިލިސް މެންބަރެއް ކަމަށް ވިޔަސް، ނޫސްވެރިއެއް ކަމަށް ވިޔަސް، ނުވަތަ ދިވެހި ކޮންމެ ރައްޔިތަކަށް ވިޔަސް، އަނެކާގެ ކަރާމާތަށް އުނިކަން އަންނަ ގޮތަށް ވާހަކަދެއްކުމުގެ އިހްތިޔާރެއް ލިބިގެން ނުވެއެވެ. އަދި ސިޔާސީ ޕާޓީތަކުގެ މައިގަނޑު މަގްސަދަކީ ރައްޔިތުންނަށް ދިމާވެފައިވާ ބޮޑެތި މައްސަލަތައް ހައްލުކޮށްދީ، ގައުމަށް ތަރައްގީ އާއި ކުރިއެރުން ގެނެސްދިނުން ކަމުގައި ވީ ނަމަވެސް، މިއަދު ފެންނަމުންދަނީ އެއާ ހިލާފު މަންޒަރުތަކެއް ކަމަށް އޭނާ ވިދާޅުވިއެވެ.
އަލީ މޫސާގެ ވާހަކަފުޅު ނިންމަވާލައްވަމުން ވިދާޅުވީ، އިންސާނާގެ އަބުރާއި ކަރާމާތް ގެއްލޭ ގޮތަށް މަޖިލީހުގެ ތެރެއިން އެއްވެސް މެންބަރަކަށް ފުރުސަތު ނުދެވޭނެ ކަމަށާއި، މަޖިލީހުގެ ގަވާއިދަށް އިސްލާހު ގެނެސްގެން ނަމަވެސް އެފަދަ ކަންކަން ހުއްޓުވަން ޖެހޭ ކަމަށެވެ.
