ޖަރުމަނުގެ އިރުމަތީ ސިޓީއެއް ކަމަށްވާ ލައިޕްޒިގްގެ މެދުތެރޭގައި ހިނގާބިނގާވެ އުޅޭ ސަރަޙައްދަކަށް ކާރެއް ވަދެ ހިނގާމީހުން ގައިގާ ޖެއްސުމުގެ ސަބަބުން 2 މީހުން މަރުވެ، އިތުރު 2 މީހަކަށް ސީރިއަސް އަނިޔާތަކެއް ލިބިފައިވާ ކަމަށް އެ ސިޓީގެ މޭޔަރ ބުރުކާޑް ޖަންގް ނޫސްވެރިންނަށް މައުލޫމާތު ދީފިއެވެ.
މި ހާދިސާއާ ގުޅިގެން ފުލުހުން ވަނީ އެ ކާރު ދުއްވަން އިން 33 އަހަރުގެ ޖަރުމަނު ރައްޔިތަކު ހައްޔަރުކޮށްފައެވެ. ފުލުހުން ބުނި ގޮތުގައި މިހާރު އިތުރު ނުރައްކަލެއް ނެތެވެ.
ވިލާތުގެ އެހެން ގައުމުތަކެކޭ އެއްފަދައިން، ފަހަކަށް އައިސް ޖަރުމަނުގައި ވެސް ކާރުން ޖައްސައިގެންނާއި ވަޅިން ހަމަލާދިނުމުގެ ހާދިސާތައް ވަނީ އިތުރުވެފައެވެ. މީގެ ތެރެއިން ބައެއް ހަމަލާތަކަކީ ދީނީ ނުވަތަ ސިޔާސީ މަގްސަދެއްގައި ދީފައިވާ ހަމަލާތަކެއް ނަމަވެސް، އަނެއްބައި ހަމަލާތަކަކީ ނަފްސާނީ ބަލިތައް ތަހައްމަލު ކުރަމުންދާ މީހުން ދީފައިވާ ހަމަލާތަކެކެވެ.
