ގައުމީ އެއާލައިން މޯލްޑިވިއަނުން ކުރާ ބައިނަލްއަގުވާމީ ދަތުރުތަކުގައި ބަނގުރާ ސާވް ކުރުމުގެ ހިދުމަތް ދޭން އުޅޭކަމަށް ދެކެވޭ ވާހަކަތައް އެ އެއާލައިނުން ދޮގުކޮށްފިއެވެ.
މޯލްޑިވިއަން ފްލައިޓްތަކުގައި ބަނގުރަލުގެ ހިދުމަތް ދޭން އުޅޭކަމަށް ބުނެ އެ ވާހަކަތައް ސޯޝަލް މީޑިއާގައިދަނީ ދައުރުވަމުންނެވެ.
އެކަމާއި ގުޅިގެން މޯލްޑިވިއަނުން މިއަދު ނެރުނު ބަޔާނެއްގައި ބުނީ އެ އެއާލައިންގެ ފްލައިޓްތަކުގައި ފަސިންޖަރުންނަށް އަލްކަހޯލް ދޭން ފަށަން ރާވާފައިވާކަމަށް ބުނެ ފަތުރަނީ ދޮގު ވާހަކަތަކެއްކަމަށެވެ.
މީގެ އިތުރުން މޯލްޑިވިއަނުން ބުނީ ސައްހަކަން ކަށަވަރުނުކުރެވޭ އެ ފަދަ މައުލޫމާތުތައް ހިއްސާ ނުކުރުމަށް ހުރިހާ ފަރާތްތަކުގެ ކިބައިން އެދޭކަމަށެވެ.
