ފަހި ދިރިއުޅުން ކޯޕަރޭޝަން (އެފްޑީސީ) އިން ހުޅުމާލޭ ދެވަނަ ފިޔަވަހީގައި ތަރައްގީކޮށްފައިވާ ފުލެޓުތަކުގެ އެގްރީމެންޓްތަކަކީ ކުލީގެ އެއްބަސްވުންތަކަކަށް ވާތީ، އެ ފްލެޓުތަކުގައި ރަށްވެހިކަން ރަޖިސްޓްރީ ނުކުރެވޭނެ ކަމަށް ބުނެ މާލެ ސިޓީ ކައުންސިލުން ދައްކަމުން އަންނަ ވާހަކަތަކަކީ ގާނޫނީ އެއްވެސް ހުއްޖަތެއް އޮތް ވާހަކަތަކެއްނޫން ކަމަށް ހައުސިންގ މިނިސްޓަރު ޑރ. ޢަބްދުﷲ މުއްޠަލިބު ވިދާޅުވެއްޖެއެވެ.
މިނިސްޓަރު މުއްޠަލިބް މި މޭރުމުން ވިދާޅުވީ، ރައްޔިތުންގެ މަޖިލީހުގެ މިއަދުގެ ޖަލްސާގައި އިދިކޮޅު އެމްޑީޕީއަށް ނިސްބަތްވާ މެންބަރަކު ކުރެއްވި ސުވާލަކަށް ޖަވާބުދެއްވަމުންނެވެ. މުއްޠަލިބް ވިދާޅުވީ ސިޓީ ކައުންސިލުން ދައްކަމުން އަންނަ އެފަދަ ވާހަކަތަކަކީ ރައްޔިތުންނަށް އުނދަގޫކޮށް، ސަރުކާރާއި ރައްޔިތުން ޖެއްސުމަށްޓަކައި ދައްކަމުން އަންނަ ވަރަށް ނާތަހުޒީބީ ވާހަކަތަކެއް ކަމަށެވެ.
މިނިސްޓަރު ވިދާޅުވި ގޮތުގައި، މީގެ ކުރިން ސޯޝަލް ހައުސިންގ މަޝްރޫއުތައް ހިންގާފައިވަނީ ”ސޭލް އެންޑް ޕަރޗޭސް“ އެގްރީމެންޓްތަކެއްގެ ދަށުން ނަމަވެސް، މިހާރު މި ގެންގުޅޭ ”ރެންޓް ޓު އޯން“ މޮޑެލްއަކީ ހަމައެކަނި ނަމަށް އައި ބަދަލެއް ކަމަށާއި، އެ ދެ ގޮތުގައި ވެސް ފްލެޓުގެ ފައިސާ ދައްކާ ނިމުމުން އެތަނެއްގެ މިލްކުވެރިކަން އެތަނުގެ ވެރިފަރާތަށް ލިބިގެންދާނެ ކަމަށެވެ.
”ސޭލް އެންޑް ޕަރޗޭސް އެގްރީމެންޓުގެ ދަށުން ދޫކުރާ ފުލެޓްތަކުގެ ރަޖިސްޓްރީއެއް ވެސް ހައްދައެއް ނުދޭނެ އެތަނަށް ދައްކަންޖެހޭ ފައިސާ ނުދައްކަނީހެނެއް، އެހެންވީމަ މާލެ ސިޓީ ކައުންސިލުން ރައްޔިތުންނަށް އުނދަގޫކުރުމަށްޓަކައި ދައްކަމުން އަންނަ ވާހަކަތަކެއް އެއީ،“ – މުއްޠަލިބް ވިދާޅުވިއެވެ.
މުއްޠަލިބް ވިދާޅުވީ، 20 ނުވަތަ 25 އަހަރު ވަންދެން ގަވާއިދުން ފުލެޓަށް ދައްކަންޖެހޭ ފައިސާ ދެއްކުމުން އެތަނަކީ އެ މީހެއްގެ އަމިއްލަ ތަނަކަށް ވާނެ ކަމަށެވެ. އަދި ރައްޔިތުންގެ ރަޖިސްޓްރީ ހަދައިދިނުމަށް އެފްޑީސީއަށާއި މާލެ ސިޓީ ކައުންސިލަށް ސަރުކާރުން ލިޔުމުން އަންގާފައިވާނެ ކަމަށް ވެސް މުއްޠަލިބް ވަނީ އިތުރަށް ވިދާޅުވެފައެވެ.
މީގެ އިތުރުން، ރަށްވެހިކަން ރަޖިސްޓްރީ ކޮށްދިނުމުގެ މަސައްކަތަކީ ރައްޔިތުންގެ މަޖިލީހުން ކައުންސިލްތަކަށް މަތިކޮށްފައިވާ ޒިންމާއެއް ކަމަށްވާއިރު، ކައުންސިލްތަކުން އެ މަސައްކަތް ނުކުރުމަކީ ސަރުކާރުން ވަކި ގޮތަކަށް ކަނޑައަޅައިގެން ކުރާ ކަމެއް ނޫން ކަމަށް ވެސް މުއްޠަލިބް ވަނީ ވިދާޅުވެފައެވެ.
