އިރާނުން ބަންދުކޮށްފައިވާ ހޮޒްމޫޒް ކަނޑުއޮޅީގައި ތާށިވެފައިވާ އުޅަނދުފަހަރުގެ ފަޅުވެރިންނަށް އެހީތެރިވުމުގެ ގޮތުން، ”ޕްރޮޖެކްޓް ފްރީޑަމް“ ގެ ނަމުގައި ކަނޑުގެ އައު އޮޕަރޭޝަނެއް ފަށާނެކަމަށް އެމެރިކާގެ ރައީސް ޑޮނާލްޑު ޓްރަމްޕު އިޢުލާން ކޮށްފިއެވެ. މި މަޝްރޫޢުގެ ދަށުން، އިރާނުގެ ބާރުގެ ދަށުގައިވާ އެ ކަނޑުއޮޅީގައި ތާށިވެފައިވާ އުޅަނދުތައް ސަލާމަތްތެރިކަމާއެކު ބޭރަށް ނެރުމަށް އެމެރިކާއިން ”މަގުދައްކައިދޭނެ“ އެވެ.
ޓްރަމްޕްގެ ”ޓްރޫތް ސޯޝަލް“ އެކައުންޓުގައި ބުނެފައިވަނީ، އިރާނުގެ ހަނގުރާމައިގެ ސަބަބުން ވަކި ފަރާތަކަށް ނުޖެހޭ އަދި ކުށެއްނެތް ޤައުމުތަކަށް އޭގެ އަސަރުކޮށްފައިވާ ކަމަށެވެ. އަދި ”އެ ޤައުމުތަކުގެ އުޅަނދުތައް ބަންދުކޮށްފައިވާ ސަރަޙައްދުތަކުން ރައްކާތެރިކަމާއެކު ނެރުމަށް މަގުދައްކައިދޭނެ ކަމަށާއި، އޭރުން އެ ފަރާތްތަކަށް މިނިވަންކަމާއެކު ވިޔަފާރީގެ ކަންކަމައިގެން ކުރިއަށްދެވޭނެ“ ކަމަށް އެމެރިކާއިން ބުނެފައިވާނެ ކަމަށް ވެސް ޓްރަމްޕުގެ ޕޯސްޓުގައި ވެއެވެ. މީގެ އިތުރުން، އެ އުޅަނދުތަކާއި ފަޅުވެރިން ސަލާމަތުން ބޭރަށް ނެރުމަށް ކުރެވެން ހުރި ހުރިހާ މަސައްކަތެއް ކުރާނެ ކަމަށް ވެސް އޭނާ ބުނެފައިވެއެވެ.
އެމެރިކާގެ ސެންޓްރަލް ކޮމާންޑުން ހާމަކުރި ގޮތުގައި ހޮޒްމޫޒްގެ މި އޮޕަރޭޝަނުގައި ގައިޑަޑް-މިސައިލް ޑިސްޓްރޯޔަރުތަކާއި، ވައިގެ މަގުންނާއި ކަނޑުގެ މަގުން ހަރަކާތްތެރިވާ 100 އަށްވުރެ ގިނަ ބޯއްޓާއި، އަންމޭންޑް ޕްލެޓްފޯމްތަކުގެ އިތުރުން 15000 ސިފައިން ބައިވެރިވާނެއެވެ.
ހަނގުރާމައަށް ހައްލެއް ހޯދުމަށް އިރާނާއެކު ”ވަރަށް އުންމީދީ“ މަޝްވަރާތަކެއް ކުރިއަށްދާ ކަމަށް ޓްރަމްޕު ބުނި ނަމަވެސް، އީރާނުން ވަނީ އެމެރިކާގެ މި ނިންމުމަކީ ހަމަލާބަދަލުކުރުން ހުއްޓާލުމަށްވެފައިވާ އެއްބަސްވުމާ ޚިލާފުވުން ކަމަށް ބަލާނެ ކަމުގެ އިންޒާރު ދީފައެވެ.
