ރާއްޖޭގެ މަސްވެރިކަމުގެ ސިނާއަތަށް ނިމިދިޔަ 2025 ވަނަ އަހަރަކީ ފާހަގަކޮށްލެވޭ ކުރިއެރުންތަކެއް ލިބި، ގައުމުގެ އިގްތިސާދަށް އެކަމުގެ ހެޔޮ ފައިދާތަކެއް ކުރި އަހަރެއް ކަމަށް މަރުކަޒީ ބޭންކް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ހާމަކޮށްފިއެވެ.
އެމްއެމްއޭއިން ނެރުނު 2025 ވަނަ އަހަރުގެ އަހަރީ ރިޕޯޓުގައިވާ ގޮތުން، ދުނިޔޭގެ ބާޒާރަށް ކުރިމަތިވި ގޮންޖެހުންތަކާއި ސަރަހައްދީ ހަމަނުޖެހުންތަކާއި އެކުގައި ވެސް ރާއްޖޭގެ އިގުތިސާދީ ކުރިއެރުން ވަނީ އިތުރުވެފައެވެ. އެގޮތުން 2024 ވަނަ އަހަރު އިގުތިސާދީ ކުރިއެރުން 3.5 އިންސައްތާގައި ހުރި އިރު، އޭގެ އަނެއް އަހަރު ވަނީ 6.3 އިންސައްތައަށް މަތިވެފައެވެ.
މި ކުރިއެރުމުގައި ފަތުރުވެރިކަމާއި، މާލީ ހިދުމަތްތަކުގެ އިތުރުން މަސްވެރިކަމުގެ ސިނާއަތް ވަނީ މުހިންމު ދައުރެއް އަދާކޮށްފައެވެ.
2025 ވަނަ އަހަރުގެ ތަފާސްހިސާބުތަކަށް ބަލައިލާއިރު، ރާއްޖެއިން އެކްސްޕޯޓު ކުރި މަހުގެ އަދަދު ވަނީ 92 އިންސައްތަ އިތުރުވެފައެވެ. އެމްއެމްއޭގެ އަހަރީ ރިޕޯޯޓުގައި ފާހަގަކޮށްފައިވާ ގޮތުގައި، މި ކުރިއެރުން ލިބިފައިވަނީ ރާއްޖޭގައި މަސް ބަންދުކުރާ ކުންފުނިތަކުން މަސް ގަންނަ މިންވަރު އިތުރުވުމާއި، ބައިނަލްއަގުވާމީ ބާޒާރުގައި ދިވެހި މަހުން އުފައްދާ ބާވަތްތަކަށް އޮތް މަގުބޫލުކަން އިތުރުވުމުގެ ސަބަބުންނެވެ. އެގޮތުން މަސްވެރިކަމުގެ ސިނާއަތުގެ އުފެއްދުންތެރިކަމުގެ ނިސްބަތަށް ބަލައިލާއިރު، 2024 ވަނަ އަހަރު 33.1 އިންސައްތަ ދަށަށް ދިއުމަށްފަހު، މިދިޔަ އަހަރު ވަނީ 30.8 އިންސައްތައިގެ ކުރިއެރުމެއް ހޯދައިފައެވެ. މީގެ އިތުރުން މަސްވެރިންގެ އަތުން ގަތް މަހުގެ ޖުމުލަ މިންވަރު 66 އިންސައްތަ އިތުރުވެ، 88.3 ހާސް މެޓްރިކް ޓަނަށް ވަނީ އަރައިފައެވެ.
މަސްވެރިކަމުގެ ސިނާއަތަށް މިފަދަ ބޮޑު ކުރިއެރުމެއް ލިބުނު މައިގަނޑު މަގުސަދަކީ ކަޅުބިލަމަހާއި ރީނދޫ އުރަހަ ކަންނެލީގެ މަސްވެރިކަމެވެ. މަސް ގަނެފައިވާ މިންވަރަށް ބަލާއިރު، ގަތް މަހުގެ 82 އިންސައްތަ ހިއްސާކުރާ ކަނޑުމަސް ގަތް މިންވަރު ވަނީ 80 އިންސައްތަ އިތުރުވެފައެވެ. ޖުމްލަ ހިއްސާގެ 17 އިންސައްތަ ހިއްސާކުރާ ކަންނެލި މަސް ގަތް މިންވަރު ވަނީ 20 އިންސައްތަ އިތުރުވެފައެވެ. މި ދެ ބާވަތަކީ ރާއްޖޭގެ މަސްވެރިކަމުގެ ޖުމުލަ އުފެއްދުމުގެ 99 އިންސައްތައެވެ.
ބޭރު ފައިސާގެ އާމްދަނީ އިތުރުކުރުމަށްޓަކައި މަސްވެރިކަމުގެ ސިނާއަތުން ކުރި މަސައްކަތުގެ ތެރެއިން، ރާއްޖެއިން ވަނީ ޖުމުލަ 76.4 ހާސް މެޓްރިކް ޓަނުގެ މަސް އެކްސްޕޯޓްކޮށްފައެވެ. ތަފާސްހިސާބުތަކުން ދައްކާގޮތުގައި، ގަނޑުކުރި ކަނޑުމަސް އެކްސްޕޯޓްކުރި މިންވަރު 158 އިންސައްތައިގެ ބޮޑު ކުރިއެރުމެއް ހޯދާފައިވާއިރު، ގަނޑުކުރި ކަންނެލި 7 އިންސައްތަ، ދަޅުގައި ބަންދުކުރި މަސް 9 އިންސައްތަ އަދި ހިކިމަސް ބޭރުކުރި މިންވަރު ވަނީ 32 އިންސައްތަ އިތުރުވެފައެވެ. މި ކުރިއެރުންތަކާއެކު، މަސްވެރިކަމުގެ އުފެއްދުންތަކުން ލިބުނު ޖުމްލަ އާމްދަނީ ވަނީ 56 އިންސައްތަ (52.2 މިލިއަން އެމެރިކާ ޑޮލަރު) އިތުރުވެފައެވެ.
މަސްވެރިކަމުގެ ސިނާއަތަށް މިފަދަ ބޮޑު ކުރިއެރުމެއް ލިބިފައިމިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން މަސްވެރިކަމުގެ ސިނާއަތް މިހާރަށްވުރެ ބޮޑަށް ހަރުދަނާކުރުމަށްޓަކައި ގެންގުޅުއްވާ ސިޔާސަތުތަކުގެ ސަބަބުން ކަމަށް އިގްތިސާދީ މާހިރުން ސިފަކުރައްވައެވެ.
