އިރާނާއެކު ކުރަމުންދާ ހަނގުރާމައާ ގުޅޭގޮތުން ރައީސް ޑޮނަލްޑް ޓްރަމްޕާއި ވިލާތުގެ ގައުމުތަކާ ދެމެދު އުފެދިފައިވާ ހިޔާލުތަފާތުވުންތައް ބޮޑުވެ، ނޭޓޯގެ ބައިވެރިއެއް ކަމަށްވާ ޖަރުމަނުވިލާތުގައި ތިބި އެމެރިކާގެ 5000 ސިފައިން ބާލަން ނިންމާފައިވާކަން ޕެންޓަގަން އިން ހުކުރު ދުވަހު އިއުލާންކޮށްފިއެވެ.
މި ހަނގުރާމަ ހުއްޓާލުމަށް ކުރަމުންދާ މަޝްވަރާތަކުގައި އިރާނުން އެމެރިކާ ބަދުނާމުކުރަމުންދާ ކަމަށާއި، އެމެރިކާއިން މިކަމުގައި ގެންގުޅޭ ސިޔާސަތެއް ނުފެންނަ ކަމަށް ޖަރުމަނުގެ ޗާންސެލަރ ފްރެޑްރިކް މާރޒް މި ހަފުތާގެ ކުރީކޮޅު ބުނުމާއި ގުޅިގެން، ޓްރަމްޕް ވަނީ ސިފައިން މަދުކުރާނެ ކަމުގެ އިންޒާރު ކުރިން ދީފައެވެ.
ޕެންޓަގަން އިން ބުނި ގޮތުގައި މި ސިފައިން ބޭލުމުގެ މަސައްކަތް ކުރިއަށް އޮތް 6 މަހާއި 12 މަސްދުވަހުގެ ތެރޭގައި ނިންމާލެވޭނެއެވެ. ޖަރުމަނުވިލާތަކީ ވިލާތުގެ ގައުމުތަކުގެ ތެރެއިން އެމެރިކާގެ އެންމެ ގިނަ ސިފައިން ތިބޭ ގައުމެވެ. އެގައުމުގައި އެމެރިކާގެ 35000 އެކްޓިވް ޑިއުޓީ ސިފައިން މިހާރުވެސް ތިބެއެވެ.
