އެމަނިކުފާނަކީ ވެރިކަމުން މީހުން ބާލަން ދަންނަ ބޭފުޅެއް ކަމަށާއި، ހަޔާތުގައި މިހާތަނަށް ގިނަ ވެރިންތަކެއް ވެރިކަމުން ބާލާފައިވާނެ ކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިހެން ވިދާޅުވީ، އެމްޑީޕީގެ ޗެއާޕާސަން އިންތިޚާބުގެ ކެންޕެއިންގެ ތެރެއިން ރޭ ދ. ކުޑަހުވަދޫގައި ބޭއްވި ބައްދަލުވުމެއްގައި ޕާޓީގެ އާންމު މެންބަރަކު ކުރި ސުވާލަކަށް ޖަވާބު ދެއްވަމުންނެވެ. އެ މެންބަރު ވަނީ، މި އިންތިޚާބު ކޮންމެ ގޮތަކަށް ނިމުނު ކަމުގައިވިޔަސް، ކުރިއަށް އޮތް 2028 ވަނަ އަހަރުގެ ރިޔާސީ އިންތިޚާބު އެމްޑީޕީއަށް ކާމިޔާބުކޮށްދެއްވުމަށް ނަޝީދު މަސައްކަތް ކުރައްވާނަންތޯ އާއި، އެކަމަށް ކިހާ ވަރަކަށް މަސައްކަތް ކުރައްވާނަންތޯ ސުވާލުކޮށްފައެވެ.
އެ ސުވާލަށް ޖަވާބު ދެއްވަމުން ރައީސް ނަޝީދު ވިދާޅުވީ 2028 ގެ ވެރިކަން އެމްޑީޕީއަށް ހޯއްދަވައިދެއްވަން 24 ގަޑިއިރު މަސައްކަތް ކުރައްވާނެ ކަމަށެވެ.
”24 ގަޑިއިރު. އިރާދަކުރެއްވިއްޔާ އަޅުގަނޑުމެންނަށް އެކަން ކުރެވޭނެ. އަޅުގަނޑަށް ހަޔާތުގައި ކުރަން އެނގޭ ކަމަކީ މީހުން ވެރިކަމުން ބޭލުން. ރައީސް މައުމޫން 30 އަހަރު ވެރިކަމުގައި އިންނެވި. އަޅުގަނޑުމެންނަށް އެކަންވެސް ކުރެވިއްޖެ. ރައީސް ޔާމީން ހުރިހާ ބާރުތަކަކާއެކުގައި އިންނެވި. އަޅުގަނޑުމެންނަށް އެކަންވެސް ކުރެވިއްޖެ،“ ނަޝީދު ވިދާޅުވިއެވެ.
މީގެ އިތުރުން ނަޝީދު ވިދާޅުވީ، އެމަނިކުފާނުގެ މައްޗަށް ބައެއް ފަރާތްތަކުން ކުރާ ތުހުމަތުތަކަށް އިޝާރާތް ކުރައްވައި، އަމިއްލަ ޕާޓީގެ ވެރިކަން ބަދަލުކުރި ކަމަށް ކުރާ ތުހުމަތުތަކަށްވެސް ބާރުދެއްވާފައެވެ. އަދި މިހާރު މިއޮތް ރައީސް ޑރ. މުޙައްމަދު މުޢިއްޒުގެ ވެރިކަން ބަދަލުކުރުމަށްޓަކައި އެމަނިކުފާނާ އެއްވަރަށް މަސައްކަތް ކުރާނެ އެކަކުވެސް ނުހުންނަ ވަރަށް މަސައްކަތް ކުރައްވާނެ ކަމަށް ވިދާޅުވިއެވެ.
ނަޝީދު މިހެން ވިދާޅުވެފައިވާއިރު، ރާއްޖޭގެ ސިޔާސީ ތާރީޚަށް ބަލާއިރު، ކުރީގެ ރައީސް މައުމޫން އަބްދުލްޤައްޔޫމްގެ 30 އަހަރުގެ ވެރިކަން ނިމުމަކަށް އައީ ނަޝީދު އިސްވެ ހުންނަވައި ވެރިކަން ބޭނުންވެގެން ފެށި ކެމްޕޭނުގައި ބަދަލަކަށް ގިނަބަޔަކު ނުކުމެ ކުރި މަސައްކަތުންނެވެ. ނަމަވެސް، ނަޝީދުގެ އަމިއްލަ ވެރިކަމުގެ ދައުރު ހަމަވުމުގެ ކުރިން އެމަނިކުފާނު ވަނީ އިސްތިއުފާ ދެއްވާފައެވެ.
އޭގެ ފަހުން ރައީސް ޔާމީންގެ ވެރިކަމަށްފަހު، އެމްޑީޕީގެ ރައީސް އިބްރާހީމް މުޙައްމަދު ޞާލިޙް ވެރިކަމަށް ވަޑައިގެންނެވި ނަމަވެސް، އެ ދައުރު ނިމުނުއިރު އެމްޑީޕީ އޮތީ ދެބަޔަކަށް ބައިބައިވެ ރޫޅިފައެވެ. އެމްޑީޕީއަށް ދެވަނަ ދައުރެއް ކާމިޔާބު ނުވެ، ރައީސް މުޢިއްޒަށް ވެރިކަން ލިބިވަޑައިގަތީ ރައީސް ނަޝީދު އިދިކޮޅުގައި އިސްވެ ހުންނަވައި ކުރެއްވި މަސައްކަތުން ކަމަށް އޭރު އެމްޑީޕީން ވަނީ ތުހުމަތުކޮށްފައެވެ. އޭރު ރޫޅާލި ކެޔޮގަނޑު އަނެއްކާވެސް ރާވައިގެން ކުރިއަށް ދިޔަނަމަވެސް އަދިވެސް އޮތީ މުޅިއަކުން ހަމަޔަކަށް ނޭޅި އެރޫޅުނުގޮތަށް ކަމަށް ގިނަބަޔަކުދަނީ ބުނަމުންނެވެ.
