ސަރުކާރުން މަސްވެރިންނަށް ދޭން ޖެހޭ ފައިސާގެ ތެރެއިން 70 މިލިއަން ރުފިޔާ ދޫކޮށްފައިވާ ކަމަށް ފިޝަރީޒް މިނިސްޓްރީން ބުނެފިއެވެ.
ފިޝަރީޒް މިނިސްޓްރީން ނެރުނު ނޫސްބަޔާނެއްގައި ބުނީ މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) ގެ ފަރާތުން މަސްވެރިންނަށް ބުދަ ދުވަހުގެ ރޭގެ ނިޔަލަށް 70 މިލިއަން ރުފިޔާ ޖަމާކޮށްފައިވާ ކަމަށެވެ. އަދި ސަރުކާރުން ދީފައިވާ ޔަގީންކަމާ އެއްގޮތަށް އަންނަ ހޯމަ ދުވަހުގެ ކުރިން ބާކީ 30 މިލިއަން ރުފިޔާ ޖަމާވާނެ ކަމަށް އެ ބަޔާނުގައި ބުނެފައިވެއެވެ.
ފިޝަރީޒް މިނިސްޓްރީގެ ބަޔާނުގައި ބުނީ މަސްވެރިންނަށް ލިބެން ޖެހޭ ފައިސާ ނުލިބިގެން މަސްވެރިން ކޫއްޑޫ އާއި އައްޑޫގައި ކުރަމުން ދިޔަ އިހުތިޖާޖު ހުއްޓާލުމާ ގުޅިގެން އެ ތަންތަން މިހާރު އޮޕަރޭޝަނަށް ގެނެސްފައިވާ ކަމަށެވެ. ކޫއްޑޫގައި އިހުތިޖާޖު ކުރަމުން ދިޔަ މަސްވެރިންނާ ބައްދަލުކުރުމަށް ފިޝަރީޒް މިނިސްޓަރު ވަޑައިގަތުމުން މަސްވެރިންނާއި އޮޑިވެރިންގެ ފަރާތުން ލިބުނު އެއްބާރުލުން ފާހަގަކޮށް މިނިސްޓްރީން ވަނީ ސަރުކާރުގެ ހުށަހެޅުން ގަބޫލުކޮށް ކުރަމުންދިޔަ ސުލްޙަވެރި އިހުތިޖާޖު ހުއްޓާލައި އެނބުރި މަސްވެރިކަމަށް ނިކުތުމަށް މަސްވެރިން ނިންމާފައިވާތީ ޝުކުރު އަދާކޮށްފައެވެ.
”މިފަދަ ދަނޑިވަޅުތަކުގައި މަސްވެރިކަމާ ގުޅުންހުރި ހަރަކާތްތައް ހިންގާ ފެސިލިޓީތައް ހުއްޓިފައި އޮންނަ އޮތުމާ ގުޅިގެން އެކަމުގެ ސަބަބުން މަސްވެރިންނަށާއި މަސްވެރި ޢާއިލާތަކަށާ އަދި އެ ކުންފުނިތަކަށް ބޮޑެތި ގެއްލުންތައް ވަމުންދާކަމީ ދިވެހި ދައުލަތާއި މި ވުޒާރާއިން ނުހަނު ކަންބޮޑުވާ ކަމެއްކަން ފާހަގަކުރަމެވެ. އަދި މިފަދަ ކަންކަން ތަކުރާރުވިޔަ ނުދިނުމަށް އަޅުގަނޑުމެން އެންމެން އެކުގައި މަސައްކަތްކުރުމުގެ މުހިންމުކަންވެސް މި ފުރުޞަތުގައި ފާހަގަކުރަމެވެ،“ ފިޝަރީޒް މިނިސްޓްރީގެ ބަޔާނުގައިވެއެވެ.
ފިޝަރީޒް މިނިސްޓްރީން ބުނި ގޮތުގައި އެ މިނިސްޓްރީން މިފްކޯ އާއި ފިނޭންސް މިނިސްޓްރީ އާއި ކަމާ ބެހޭ އެހެނިހެން މިނިސްޓްރީތަކާ ގުޅިގެން މަސްވެރިންނާއި މަސްވެރިކަމުގެ ސިނާއަތުގައި ހުރި ކަންބޮޑުވުންތައް ހައްލުކުރުމުގެ މަސައްކަތް ކުރަމުންދާނެ ކަމުގެ ޔަގީންކަންދޭ ކަމުގައެވެ.
މިނިސްޓްރީގެ ބަޔާނުގައި ވަނީ މަސްވެރިންގެ ހުރި ކަންބޮޑުވުންތައް ހައްލުކޮށް މަސްވެރިކަމުގެ ސިނާއަތް ތަރައްޤީކޮށް، މަސްވެރިކަމުން ލިބޭ އާމްދަނީ އިތުރުކޮށް، މަސްވެރި ޢާއިލާތަކުގެ ތަނަވަސްކަން އިތުރުކުރުމަކީ ސަރުކާރުގެ އެންމެ ބޮޑު އެއް އަމާޒު ކަމުގައިވާތީ، މަސްއޮޑިފަހަރަށް ދޭން ޖެހޭ ފައިސާ ވީ އެންމެ އަވަަހަކަށް ދޫކުރުމުގެ އިންތިޒާމު ހަަމަޖައްސައި އެކަން ހައްލުކޮށްދެއްވުމަށް ރައީސް ޑރ. މުޙައްމަދު މުޢިއްޒު ދެއްވި އިރުޝާދާއި މަސައްކަތްޕުޅު ފާހަގަކޮށްފައެވެ. އަދި ފިނޭންސް މިނިސްޓަރާއި މިފްކޯގެ މެނޭޖްމަންޓާއި މުވައްޒަފުން ދެއްވި އެއްބާރުލުން ފާހަގަކޮށް އެފަރާތްތަކަށް ވެސް މިނިސްޓްރީން ވަނީ ޝުކުރު އަދާކޮށްފައެވެ.
