މި އަހަރު ވެސް ގައުމީ ދުވަސް ފާހަގަކުރާނީ ހއ. އުތީމުގައި ކަމަށް ހެރިޓޭޖް މިނިސްޓަރު ހީނާ ވަލީދު ވިދާޅުވެއްޖެއެވެ.
މިނިސްޓަރު ހީނާ މި މޭރުމުން ވިދާޅުވީ ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ހެރިޓޭޖް މިނިސްޓްރީގެ މަސައްކަތްތަކާއި ގުޅޭގޮތުން މައުލޫމާތުދެއްވަމުންނެވެ. ހީނާ ވިދާޅުވީ، ގައުމީ ފެންވަރުގައި ގައުމީ ދުވަސް ފާހަގަކުރުމަށް ކުރަންޖެހޭ މަސައްކަތްތައް ކުރަމުން އަންނަ ކަމަށާއި، މިދިޔަ އަހަރެކޭ އެއްގޮތަށް މި އަހަރު ވެސް ގައުމީ ދުވަސް ފާހަގަކުރާނީ އުތީމުގައި ކަމަށެވެ.
މިއަދު ބޭއްވި ޕްރެސް ކޮންފަރެންސްގައި ހީނާ ވަނީ، އުތީމުގައި ކުރިއަށްގެންދާ މަޝްރޫއުތަކާ ގުޅޭ މައުލޫމާތު ވެސް ހިއްސާކުރައްވައިފައެވެ. އެގޮތުން އެންމެ މުހިންމު މަޝްރޫއެއްގެ ގޮތުގައި ހީނާ ފާހަގަކުރެއްވީ، އެ ރަށުގައި ހުރި ޣާޒީ ބަންޑާރައިންގެ އާސަރުތައް ހިމާޔަތްކުރުމުގެ މަޝްރޫއެވެ.
މީގެ އިތުރުން، އުތީމު ކަނދުވަލު މިސްކިތް ހިމެނޭ ސަރަހައްދުގައި ސްޓޯރީ ފޮރެސްޓް ޕާކެއް ތަރައްގީކުރުމާއި، ކަނދުވަލު މިސްކިތާއި، މިސްކިތާއި ގުޅިފައިވާ އާސާރުތައް ތަރައްގީކުރުމާއި، އުތީމު ގަނޑުވަރު މަރާމާތުކުރުމާއި އަލިކުރުމުގެ މަސައްކަތްކުރުމާއި، ބޮޑުތަކުރުފާނުގެ ހަނދާނުގައި ދޮރުވައްޓަކާއި، އިސްރަށްވެރިންގެ ޕާކެއް ތަރައްގީކުރުން ހިމެނޭ ކަމަށް ހީނާ ވިދާޅުވިއެވެ.
ހީނާ އިތުރަށް ވިދާޅުވީ މި އަހަރުގެ ގައުމީ ދުވަސް އަންނަންވާއިރަށް މި މަޝްރޫއުތައް ނިންމައި އިފްތިތާހު ކުރެވިގެންދާނެ ކަމަށެވެ.
