ގިނަބައެއްގެ އެދުމުގެ މަތިން ގައުމީ ދާރުލްއާސާރު ހޮނިހިރު ދުވަހު ހުޅުވާފައި ބެހެއްޓުމަށް ނިންމާފައިވާ ކަމަށް ހެރިޓޭޖް މިނިސްޓަރު ހީނާ ވަލީދު ވިދާޅުވެއްޖެއެވެ.
މިނިސްޓަރު ހީނާ މި މޭރުމުން ވިދާޅުވީ ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ހެރިޓޭޖް މިނިސްޓްރީގެ މަސައްކަތްތަކާއި ގުޅޭގޮތުން މައުލޫމާތުދެއްވަމުންނެވެ. މިނިސްޓަރު ވިދާޅުވީ، ގައުމީ ދާރުލްއާސަރު ހުޅުވާފައި ހުންނަ ދުވަސްތައް އިތުރު ކުރުމަށާއި، ދާރުލްއާސާރަށް ވަދެވޭ ގަޑިތައް އިތުރުކޮށްދިނުމަށް ވަރަށް ގިނަ ބަޔަކު އެދެމުން އަންނަ ކަމަށެވެ.
އެހެންކަމުން ގިނަބައެއްގެ އެދުމުގެ މަތިން، މަޝްވަރާކުރަންޖެހޭ ފަރާތްތަކާއެކު މަޝްވަރާކޮށް ރަސްމީ ދުވަސްތަކުގައި ހުޅުވާފައި ހުންނަ ހުރުމުގެ އިތުރުން ދާރުލްއާސާރަށް ވަދެ އެތަނުގައި ހުރި ބައެއް ކަހަލަ ކަންކަން ބަލައި ދިރާސާކޮށް، ކިޔަވާ ކުދިންނަށާއި ރައްޔިތުންނަށް ވަދެވޭ ގޮތަށް ކޮންމެ ހޮނިހިރު ދުވަހެއްގެ ހެނދުނު 10:00 އިން ފެށިގެން ހަވީރު 16:00 އާއި ހަމައަށް ހުޅުވާފައި ބެހެއްޓުމަށް ނިންމާފައިވާ ކަމަށް ހީނާ ވަނީ ވިދާޅުވެފައެވެ.
ހީނާ ވިދާޅުވީ ހޮނިހިރު ދުވަހު ދާރުލްއާސާރު ހުޅުވަން ފަށާނީ މި މަހުގެ 18 ވާ ހޯމަ ދުވަހުން ފެށިގެން ކަމަށެވެ.
”އެކި ފަރާތްތަކުން އެދިވަޑައިގަންވާ ގޮތުގެ މަތިން ވީހާވެސް ގިނަ ބޭފުޅުންނަށް ގައުމީ ދާރުލްއާސާރަށް ވަދެ އެތަނުގައި ހުރި ބައެއް ތަންތަން ބަލައި ދިރާސާކޮށް، ކިޔަވާ ކުދިންނަށާއި ރައްޔިތުންވެސް ބޭނުންވާ ގަޑިތަކުގައި ވަދެވޭނެ ގޮތް ހެދުމުގެ ގޮތުން ކޮންމެ ހޮނިހިރު ދުވެހެއްގެ ވެސް ހެނދުނު 10 އަކުން ހަވީރު 4 ކަށް، 18 މޭ އިން ފެށިގެން އަޅުގަނޑުމެން ކޮންމެ ހޮނިހިރު ދުވަހެއްގަ ދާރުލްއާސާރު ހުޅުވާފަ މީހުންނަށް ވަދެވޭނެ ގޮތައް ބެހެއްޓުމަށް މިހާރު ވަނީ ނިންމާފަ،“ – މިނިސްޓަރު ހީނާ ވިދާޅުވިއެވެ.
މީގެ އިތުރުން، ހަވީރު 17:00 އިން ފެށިގެން ރޭގަނޑު 21:00 ނުވަތަ 22:00 އާއި ހަމައަށް ދާރުލްއާސާރަށް ވަދެވޭނެ ވަގުތު އިތުރު އިތުރުކޮށްދިނުމަށް ވެސް ގިނަ ބަޔަކު އެދެމުން އަންނަކަން މިނިސްޓަރު ފާހަގަކުރެއްވިއެވެ.
މިކަމާ ގުޅިގެން ހީނާ އިތުރަށް ވިދާޅުވީ، ދާރުލްއާސާރު ހުޅުވާފައި ހުންނަ ވަގުތު އިތުރުކުރުމަށްޓަކައި އިދާރީ ގޮތުން ގެންނަންޖެހޭ ބަދަލުތައް ގެނައުމާއެކު ވަގުތު އިތުރު ކުރުމަށްޓަކައި ކުރަންޖެހޭ މަސައްކަތްތައް ކުރަމުން އަންނަ ކަމަށެވެ. މި މަސައްކަތްތައް ނިމުނުހައި އަވަހަކަށް ރޭގަނޑުގެ ވަގުތުގައި ދާރުލްއާސާރަށް ވަދެވޭނެ ކަމަށް މިނިސްޓަރު ވަނީ ވިދާޅުވެފައެވެ.
