ދެ އަހަރު ވަންދެން ނިރުބަވެރި އިޒްރޭލުން ޣައްޒާގައި މެދުކެނޑުމެއްނެތި ހިންގި ނަސްލުހޭދުގެ ސަބަބުން މުޅި ސިޓީ ސުންނާފަތިވެފައިވާއިރު، އެތައް ހާސް ބައެއްގެ ހަށިގަނޑު އަދިވެސް ވަނީ ބިމާހަމަކުރެވިފައިވާ އިމާރާތްތަކުގެ ދަށުގައެވެ. އދ. ގެ އޮފިޝަލަކާ ޙަވާލާދީ އިޒްރޭލުގެ މީޑިއާއަކުން ރިޕޯޓުކޮށްފައިވާ ގޮތުގައި، ޣައްޒާގެ ކޮންކްރީޓްތަކުގެ ދަށުގައި ފަލަސްޠީނުގެ 8،000 އަށްވުރެ ގިނަ މީހުންގެ ހަށިގަނޑު އަދިވެސް ތާށިވެފައި އެބަހުއްޓެވެ.
ސާފުކުރުމަށް 7 އަހަރުގެ މުއްދަތެއް
ސުންނާފަތިވެފައިވާ މިންވަރު ބޮޑުކަމުން، މީހުން ހޯދުމުގެ ލޮޖިސްޓިކް މަސައްކަތްތަކަށް ވަނީ ވަރަށް ބޮޑެތި ހުރަސްތަކެއް އެޅިފައެވެ. ’ހާރެޓްޒް‘ ނޫހުން އދ. ގެ ޑިވެލޮޕްމަންޓް ޕްރޮގްރާމް (ޔޫއެންޑީޕީ) ގެ އޮފިޝަލަކާ ޙަވާލާދީ ބުނެފައިވަނީ، މިހާތަނަށް ސާފުކުރެވިފައިވަނީ ވެއްޓިފައިވާ އިމާރާތްތަކުގެ އެންމެ 1 އިންސައްތަ ކަމަށެވެ. މިހާރު މަސައްކަތް ކުރިއަށްދާ ލަސް މިނުގައި ބަލާނަމަ، މުޅި ސަރަޙައްދު ސާފުކޮށް މީހުންގެ ހަށިގަނޑުތައް ނެގުމަށް 7 އަހަރު ދުވަސް ނަގާނެކަމަށް އދ. އިން ލަފާކުރެއެވެ.
ފަލަސްޠީނުގެ ސިވިލް ޑިފެންސުން ބުނާގޮތުގައި، އެމީހުންގެ އަތުގައި ބޮޑެތި އެކްސްކަވޭޓަރު ފަދަ މެޝިނަރީއާއި ތެޔޮ ނެތުމުގެ ސަބަބުން މަސައްކަތްތައް ވަނީ ގާތްގަނޑަކަށް ހުއްޓިފައެވެ. މިއާއެކު، އެތައް ހާސް ޢާއިލާތަކުން ދަނީ އެމީހުންގެ ލޯބިވާ މީހުންގެ ހަށިގަނޑުތައް ފެނި ރަނގަޅު ގޮތުގައި ވަޅުލެވޭނެ ދުވަހަކަށް އިންތިޒާރުކުރަމުންނެވެ.
ފުނޑުފުނޑުވެފައިވާ ބިނާތައް
އދ. އިން ލަފާކުރާ ގޮތުގައި އިޒްރޭލުގެ ދެ އަހަރުގެ އަސްކަރީ ކެމްޕޭންގައި ޣައްޒާގެ ޢާންމު ބިނާތަކުގެ 90 އިންސައްތަ ވަނީ އެއްކޮށް ފުނޑުފުނޑުކޮށްލާފައެވެ. އަދި އަލުން ޣައްޒާ އާރާސްތުކުރުމަށް މެކްރޯއިކޮނޮމިކް ގޮތުން 70 ބިލިއަން ޑޮލަރު ޚަރަދުވާނެކަމަށް ވަނީ ލަފާކޮށްފައެވެ.
އޮކްޓޯބަރު 2025 ގައި ސުލްޙައިގެ އެއްބަސްވުމެއްގައި ސޮއިކުރި ނަމަވެސް، އިޒްރޭލުން ދަނީ މެދުނުކެނޑި އެއްބަސްވުމާ ޚިލާފުވަމުންނެވެ. ޣައްޒާގެ ޞިއްޙަތާބެހޭ ވުޒާރާއިން ބުނާގޮތުގައި، ދެ އަހަރު ވަންދެން މެދުކެނޑުމެއްނެތި އިޒްރޭލުން ހިންގި ނަސްލުހޭދުގައި 72،000 އަށްވުރެ ގިނަ މީހުން ޝަހީދުވެ 172،000 މީހުންނަށް އަނިޔާވެފައިވާއިރު، ޙަމަލާދިނުން ހުއްޓާލުމަށް ވި އެއްބަސްވުމަށްފަހު އަނިޔާވެރި ޔަހޫދީ އިސްތިއުމާރުން ދިން ޙަމަލާތަކުގައި އިތުރު 820 އަށްވުރެ ގިނަ މީހުން ވަނީ ޝަހީދުކޮށްލާފައެވެ. މިކަމުގެ ސަބަބުން ސާފުކުރުމުގެ މަސައްކަތްތައް ވަނީ އިތުރަށް ލަސްވެފައެވެ.
