ސިޔާސީ ބައެއް ލީޑަރުންގެ އަމިއްލަ މަންފާއަށްޓަކައި ރާއްޖޭގެ އެންމެމަތީ ވެރިޔާ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް ނިސްބަތްކޮށް ދޮގު ޚަބަރު ފަތުރަމުންދާ ކަމަށް ވިދާޅުވެ، ދައުލަތުގެ ކަމާބެހޭ މުއައްސަސާތަކުން އެ ފަރާތްތަކުގެ ގާނޫނީ ޒިންމާ އަދާކުރުމަށް ރައްޔިތުންގެ މަޖިލީހުގެ ވިލިމާލެ ދާއިރާގެ މެންބަރު މުޙައްމަދު އިސްމާއިލް ގޮވާލައްވައިފިއެވެ.
މެންބަރު މުޙައްމަދު އިސްމާއިލް މިކަމަށް ގޮވާލެއްވީ މިއަދު އެކްސްގައި ކުރެއްވި ޕޯސްޓެއްގައެވެ. އޭނާ ފާހަގަކުރެއްވި ގޮތުގައި، ބައެއް ސިޔާސީ ލީޑަރުން އެބައިމީހުންގެ އަމިއްލަ އަންބޮނޑި ބޮޑުކުރުމުގެ ބޭނުމުގައި، ނޫސްމަޖައްލާތަކާއި، ޓީވީ ޗެނަލްތަކުގެ އިތުރުން މީސްމީޑިއާ އާއި ޕާޓީތަކުގެ އެކްޓިވިސްޓުން ނަހަމަ ގޮތުގައި ބޭނުންކުރަމުންދާ ކަމަށެވެ.
ޚާއްޞަކޮށް މާލޭގެ މަގުތަކުގައި އަޑުގަދަކުރާ ވަސީލަތްތައް ބޭނުންކޮށްގެން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޒާތުފުޅަށް ނިސްބަތްކޮށް ބުހުތާނު ދޮގު ޚަބަރު ފަތުރަމުންދާ ކަމަށް މުޙައްމަދު އިސްމާއިލް ތުހުމަތު ކުރެއްވިއެވެ. އޭނާ ވިދާޅުވީ މިފަދަ އަމަލުތައް ހިންގަމުންދާއިރު، ދައުލަތުގެ ކަމާބެހޭ މުއައްސަސާތަކުން ހިމޭނުން ތިބުމަކީ ބަލައިގަނެވޭނެ ކަމެއް ނޫން ކަމަށެވެ.
ސިޔާސީ ލީޑަރުން އެބައިމީހުންގެ އަމިއްލަ އަންބޮނޑި ބޮޑުކުރުމައްޓަކާ ނޫސްމަޖައްލާތަކާ ޓީވީ ޗެނަލްްތަކާ މީސްމީޑިޔާތަކާ ޕާޓީތަކުގެ އެކްޓިވިސްޓުން ބޭނުންކޮއްގެން ފުރަމާލޭގެ މަގުތައްމަތީ ދެކޮޅައްދުވެ އަޑުގަދަކުރާ ވަސީލަތްތައް މެދުވެރިކޮއް ދިވެހިރާއްޖޭގެ އެންމެމަތީ ވެރިޔާގެ ޒާތުފުޅައް…
— Mohamed Ismail (@MPMohdIsmail) May 2, 2026
މި މޭރުމުން ވާހަކަދައްކަވަމުން މެންބަރު ވަނީ މޯލްޑިވްސް ބްރޯޑްކާސްޓިންގ ކޮމިޝަނާއި، ސިޔާސީ ޕާޓީތަކުގެ ބެލެނިވެރި ފަރާތް ކަމަށްވާ އިލެކްޝަންސް ކޮމިޝަނުން އެ ފަރާތްތަކުގެ ގާނޫނީ ޒިންމާ އަދާކުރުމަށް ހަމައިސްކޮޅަށް ތެދުވުމަށް ބާރުއަޅުއްވާފައެވެ.
”ބްރޯޑްކާސްޓިންގ ކޮމިޝަނާއި، އިލެކްޝަންސް ކޮމިޝަނުން އެ ފަރާތްތަކުގެ ގާނޫނީ ޒިންމާ އަދާކުރުމަށް ހަމައިސްކޮޅަށް ތެދުވަންޖެހޭ،“ މެންބަރުގެ ޕޯސްޓުގައި ބަޔާންކުރައްވާފައިވެއެވެ.
މުޙައްމަދު އިސްމާއިލް އިތުރަށް ފާހަގަކުރެއްވި ގޮތުގައި، މިނިވަން މުއައްސަސާތަކަށް މަތިކޮށްފައިވާ ގާނޫނީ މަސްއޫލިއްޔަތުތައް ފުރިހަމައަށް އަދާކޮށް، ދޮގު ޚަބަރު ފެތުރުމާއި ފިތުނަ އުފެއްދުމަށް ކުރާ މަސައްކަތްތައް ވަގުތުން ހުއްޓުވަން ޖެހެއެވެ.
މި ފަހަކަށް އައިސް ސިޔާސީ މަސްރަހުގައި ރައީސް ޑރ. މުޢިއްޒުގެ ސަރުކާރަށް އަމާޒުކޮށް އިދިކޮޅު ފަރާތްތަކުން ކުރަމުންދާ ބައެއް ތުހުމަތުތަކަކީ އެއްވެސް އަސާސެއް ނެތް ދޮގު ވާހަކަތަކެއް ކަމަށް ސަރުކާރަށް ތާއީދުކުރާ މަޖިލިސް މެންބަރުންނާއި ސިޔާސީ ފަރާތްތަކުން ދަނީ ބުނަމުންނެވެ. އަދި ސަރުކާރުންވެސް ޚުދު ރައީސްވެސް ވަނީ މި ތުހުމަތުތައް ދޮގު ކުރައްވާފައެވެ.
