ވޮޝިންގޓަން / ތެހެރާން – އީރާނުގެ ބަނދަރުތަކާއި ހުރްމުޒް ކަނޑުއޮޅި ބަންދުކުރުމުގެ އޮޕަރޭޝަންގައި އެމެރިކާގެ ކަނޑުގެ ސިފައިން ޙަރަކާތްތެރިވަމުންދަނީ ”ކަނޑުފޭރޭ ބައެއްހެން“ ކަމަށް އެމެރިކާގެ ރައީސް ޑޮނަލްޑް ޓްރަމްޕް ފަޚުރުވެރިކަމާއެކު ބުނެފިއެވެ.
”ވަރަށް ފައިދާހުރި ވިޔަފާރިއެއް“
ހުކުރު ދުވަހު ފްލޮރިޑާގައި ބޭއްވި އެއްވުމެއްގައި ވާހަކަދައްކަމުން ޓްރަމްޕް ވަނީ، އެމެރިކާ ސިފައިން ވިޔަފާރި ބޯޓުފަހަރަށް އަރައި އެތަކެތި ހިފަހައްޓާ ގޮތް ވަރަށް ތަފްޞީލުކޮށް ކިޔައިދީފައެވެ. ”އަހަރެމެން އޭގެ މައްޗަށް ފައިބައި، ބޯޓުގެ ކޮންޓްރޯލް ނަގަން. އޭގައި ހުންނަ މުދަލާއި ތެޔޮވެސް އަހަރެމެން ނަގަން. މިއީ ވަރަށް ފައިދާހުރި ވިޔަފާރިއެއް،“ ޓްރަމްޕް ބުންޏެވެ. ”އަހަރެމެން މިއުޅެނީ ކަނޑުފޭރޭ ބައެއްހެން. އެކަމަކު އަހަރެމެން މިއުޅެނީ ކުޅޭކަށް ނޫން.“
މިފަދަ މޭރުމަކުން ޓްރަމްޕް ވާހަކަދައްކާފައިމިވަނީ ވަރަށް ނާޒުކު ދަނޑިވަޅެއްގައެވެ. އެމެރިކާއާއި އީރާނާ ދެމެދު މިހާރު އޮތީ މުއްދަތެއް ނެތް ވަގުތީ ސުލްޙައެކެވެ. ނަމަވެސް އެ ސުލްޙަ އޮއްވައި އޭޕްރިލް 13 ގައި ޓްރަމްޕް ވަނީ އީރާނުގެ ބަނދަރުތައް ބަންދުކޮށްފައަވެ. އަދި އީރާނުން ދާދިފަހުން ހުށަހެޅި ސުލްޙައިގެ ހުށަހެޅުންތަކާ މެދު ހިތްހަމަނުޖެހޭ ކަމަށާއި، މަޝްވަރާތައް ފެއިލްވެއްޖެނަމަ އީރާނަށް ވަރުގަދަ ޙަމަލާތަކެއް ދޭނެކަމުގެ އިންޒާރުވެސް ޓްރަމްޕް ވަނީ ދީފައެވެ.
އީރާނުގެ ރައްދު: ”އެއްވެސް ސަބަބަކާ ނުލައި ދިން ޙަމަލާއެއް“
ޓްރަމްޕްގެ މި ވާހަކަތަކާ ގުޅިގެން ތެހެރާނުން ވަނީ ވަރަށް ބޮޑަށް ރުޅިގަދަވެފައެވެ. އީރާނުގެ އަސްކަރިއްޔާއިން ބުނެފައިވަނީ، ޓްރަމްޕްގެ މި ޢަމަލުތަކުން ސާބިތުވަނީ އެމެރިކާއިން އެއްވެސް އެއްބަސްވުމަކަށް އިޙުތިރާމް ނުކުރާކަން ކަމަށާއި، އެހެންކަމުން އަލުން ހަނގުރާމަ ފެށުމަކީ ވަރަށް އެކަށީގެންވާ ކަމެއް ކަމަށެވެ.
އީރާނުގެ ޚާރިޖީ ވުޒާރާގެ ތަރުޖަމާނު އިސްމާޢީލް ބަޣާއީ ވަނީ އެކްސް ގައި އެމެރިކާ ސަރުކާރަށް ވަރަށް ބޮޑަށް ފާޑުކިޔާފައެވެ. އޭނާ ބުނީ މިއީ އެމެރިކާއިން އަމިއްލައަށް ބޭނުންވެގެން ކުރާ ހަނގުރާމައެއް ކަމަށާއި، މިއީ އެއްވެސް ސަބަބަކާ ނުލައި އީރާނާ ދެކޮޅަށް ހިންގި އިސްތިޢުމާރީ ޢަމަލެއް ކަމަށެވެ. އަދި އެމެރިކާގެ ސެނެޓަރ ކިރްސްޓެން ގިލިބްރޭންޑްގެ ވީޑިއޯއެއް ޙިއްޞާކުރަމުން އޭނާ ބުނީ، ޙަމަލާދިންއިރު އީރާނުން އެމެރިކާއަށް ޙަމަލާދޭން އުޅޭކަމުގެ އެއްވެސް ހެއްކެއް އެމެރިކާ ސަރުކާރަށް ލިބިފައިނުވާކަން ސެނެޓަރުންވެސް ޤަބޫލުކުރާ ކަމަށެވެ.
