ވިޔަފާރީގެ ބޭނުމަށް ގިނަ މުއާމަލާތް ކުރާ ސައިޓްތަކުން، ވިޔަފާރި ކުރެވޭނެ އަދަދެއް ބޭންކް އޮފް މޯލްޑިވްސް (ބީއެމްއެލް) އިން ކަނޑައަޅައިފިއެވެ.
ބީއެމްއެލްގެ މި ނިންމުމަކީ ރައްޔިތުންގެ ޒަރޫރީ ބޭނުންތަކަށް ބޭނުންވާ ބޭރު ފައިސާ ފޯރުކޮށްދިނުމަށް އެ ބޭންކުން ގެންގުޅޭ ނިޒާމުތައް މިހާރަށްވުރެ ބޮޑަށް ހަރުދަނާކުރުމަށް އަދި އެކަން ހަމަހަމަކަމާއެކު ކުރިއަށް ގެންދިއުމަށްޓަކައި އަޅަން ނިންމާފައިވާ ފިޔަވަޅެކެވެ.
މިކަމާ ގުޅިގެން ބީއެމްއެލްއިން ބުނެފައިވަނީ، ވިޔަފާރީގެ ބޭނުމަށް ބައެއް ފަރާތްތަކުން، އަމިއްލަ ބޭނުމަށް ދޫކުރެވިފައިވާ ރުފިޔާ ކާޑުތައް މެދުވެރިކޮށް އޮންލައިން ވިޔަފާރި ސައިޓްތަކުން ވިޔަފާރިކުރަން ބޭނުންކުރަމުން އަންނަ ކަމަށެވެ. މިކަމުގެ ސަބަބުން ގިނަ އަދަދަކަށް ބޭރު ފައިސާ އެކަމަށް ވިއްކެނީ ނިސްބަތުން މަދު ފަރާތްތަކަށް ކަމަށް ބީއެމްއެލްއިން ވަނީ މައުލޫމާތު ދީފައެވެ.
މިއާއެކު ބޭންކަށް ގަންނަން ލިބޭ ބޭރު ފައިސާ ގިނަ ރައްޔިތުންގެ ބޭނުންތަކަށް ވިއްކުމުގެ ބޭނުމުގައި، އެފަދަ ސައިޓްތަކުން ވިޔަފާރިކުރުމަށް ޖުމުލަ ބޭންކުން ވިއްކޭ އަދަދު ކޮންމެ ދުވަހަކަށް ކަޑައެޅޭ ބަޖެޓެއްގެ ތެރެއިން ވިއްކުމަށް ނިންމާފައިވާ ކަމަށާއި ނަމަވެސް އެހެނިހެން ބޭނުންތަކަށް ބޭނުންކުރެވޭ ސައިޓްތަކަށް ބަދަލެއް ނުގެނެސް މިހާރު ވެސް ބޭނުން ކުރެވޭވަރުގައި ހުންނާނެ ކަމަށް އެ ބޭންކުން ވަނީ މައުލޫމާތު ދީފައެވެ.
އޮންލައިން ވިޔަފާރި ސައިޓްތަކުން މަހަކު 30 ޓްރާންސެކްޝަނަށްވުރެ ގިނައިން ވިޔަފާރިކުރަނީ ކަސްޓަމަރުންގެ އެންމެ ތިން އިންސައްތައަށްވުރެ މަދު އަދަދެއްކަން ފާހަގަކުރަމުން ބީއެމްއެލްއިން ބުނެފައިވަނީ، އެއީ ކުރިން އޮންލައިން ވިޔަފާރި ސައިޓްތަކުން މުދާ ގަންނަ ފަރާތްތައް ކަމަށެވެ.
ކަން މިހެން އޮތުމާއެކު އޮންލައިން ވިޔަފާރި ސައިޓްތަކަށް ކަނޑައެޅޭ ބަޖެޓް ވީހާވެސް ބޮޑަށް ހަމަހަމަ ގޮތަކަށް ބޭނުންކުރެވޭ ގޮތް ހަމަޖެއްސުމުގެ ގޮތުން ކޮންމެ ކަސްޓަމަރަކަށް މަހެއްގެ މައްޗަށް ހެދޭ ޓްރާންސެކްޝަންގެ އަދަދު 30 އަށް ކަނޑައަޅާފައިވާ ކަމަށް ބީއެމްއެލްއިން ވަނީ އިތުރަށް ބުނެފައެވެ.
