އެމެރިކާގެ ’ވޯ ޕަވަރސް އެކްޓް އޮފް 1973‘ ދަށުން، ކުރިމަތިވެދާނެ ”ކުއްލި ނުރައްކަލަކަށް“ ރައްދުދިނުމުގެ އަސްކަރީ ހަރަކާތްތައް ކުރިއަށް ގެންދެވޭ 60 ދުވަހުގެ މުއްދަތު ހަމަވުމުން މިހާރު އީރާނާއިއެކު އެއްބަސްވެވިފައިވާ ވަޤުތީ ހަނގުރާމަ މަޑުޖައްސާލުމުގެ އެއްބަސްވުމާއިއެކު ހަނގުރާމައެއް ނެތްކަމަށް އެމެރިކާގެ ރައީސް ޑޮނަލްޑު ޓްރަމްޕު އެމެރިކާ ކޮންގްރެސް އަށް ފޮނުވި ސިޓީއެއްގައި ބުނެފިއެވެ.
އެމެރިކާގެ ރައީސް ޑޮނަލްޑު ޓްރަމްޕު ފޮނުވި ސިޓީގައި މާނަކޮށްފައިވާ ގޮތައް ބަލާއިރު އެމެރިކާ ސިފައިން ހަނގުރާމައަށް ރުކުރުވާލުމަށާއި އިތުރަށް ހަނގުރާމަ ކުރިއަށް ގެންދިއުމަށް ކޮންގްރެސްގެ ރުހުން ބޭނުމެއް ނުވާނެއެވެ.
މިއާއެކު ޓްރަމްޕު ވަނީ ”އެމީހުން އެ އެދެނީ އަހަރެންނަށް އެއްބަސް ނުވެވޭނޭ ކަންތައްތަކަށް“ ކަމަށް ބުނެ އީރާނުން އެންމެ ފަހުން ހުށަހަޅާފައިވާ ސުލްހައިގެ އެއްބަސްވުމަށް ނުރުހުން ފާޅުކޮށްފައެވެ. އަދި ޓްރަމްޕު ވަނީ ހަމަނުޖެހުންތައް އަވަސް މުސްތަގުބަލެއްގައި ނިމޭނެކަމަށް ލަފާ ނުކުރެވޭނަމަށްވެސް އިޝާރާތްކޮށްފައެވެ.
މަޝްރަހު ދިރާސާކުރާ ފަރާތްތަކުން ބުނާ ގޮތުގައި ޓްރަމްޕުގެ މި ސިޓީއަކީ އެމެރިކާ ކޮންގްރެސްގެ ރުހުން ހޯދުމަށް ޤާނޫނު ލާޒިމުކުރާ ކުރުމުން ސަލާމަތްވެ، ކުރިއެކޭވެސް އެއްގޮތަށް ހަނގުރާމައިގެ ކަންކަން ކުރިއަށް ގެންދިއުމަށް ޓްރަމްޕު ހޯދި ޤާނޫނީ ’ލޫޕް ހޯލް‘ އެކެވެ.
