ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އަށް މިދިޔަ 2025 ވަނަ އަހަރު ލިބުނު ސާފު ފައިދާއިން، ހިއްސާއަކަށް 85 ރުފިޔާ ބެހުމަށް އެ ކުންފުނީގެ ބޯޑުން ނިންމައިފިއެވެ.
މިއީ ފަހުގެ ތާރީހެއްގައި އެސްޓީއޯއިން ހިއްސާދާރުންނަށް ބަހަން ނިންމި އެންމެ ބޮޑު ހިއްސާގެ ފައިދާއެވެ. ވޭތުވެދިޔަ ތިން އަހަރަށް ބަލާއިރު، އެ ކުންފުނިން ހިއްސާގެ ފައިދާގެ ގޮތުގައި ބަހާ އަދަދު ވަނީ އިތުރުކޮށްފައެވެ. އެގޮތުން، 2024 ވަނަ އަހަރުގެ ފައިދާއިން ހިއްސާއަކަށް 80 ރުފިޔާ ރޭޓުން ބަހާފައިވާއިރު، އެއީ އޭގެ ކުރީ އަހަރާ އަޅައިބަލާއިރު ތިން ރުފިޔާގެ އިތުރުވުމެކެވެ. 2023 ވަނަ އަހަރު އެ ކުންފުނިން ބަހާފައިވަނީ ހިއްސާއަކަށް 77 ރުފިޔާއެވެ.
މި އަހަރު ހިއްސާއަކަށް ބެހި 85 ރުފިޔާއަކީ މިދިޔަ އަހަރާއި އަޅައިބަލާއިރު ހިއްސާއަކަށް ފަސް ރުފިޔާގެ އިތުރުވުމެކެވެ. ހިއްސާގެ ފައިދާ ބަހާނީ އަހަރީ އާންމު ޖަލްސާގައި ހިއްސާދާރުންގެ އަގުލަބިއްޔަތުން އެކަން ފާސްކުރުމުންނެވެ.
ރާއްޖޭގެ އެންމެ ބޮޑު ޓްރޭޑިންގ ކުންފުނި، އެސްޓީއޯ ގްރޫޕަށް މިދިޔަ 2025 ވަނަ އަހަރު އާމްދަނީގެ ގޮތުގައި 16.7 ބިލިއަން ރުފިޔާ ލިބިފައިވެއެވެ. މީގެ ތެރެއިން އެ ކުންފުންޏަށް 15.5 ބިލިއަން ރުފިޔާވަނީ ލިބިފައެވެ. މީގެ އިތުރުން ސަބްސިޑަރީތަކާ އެކު މުޅި ގްރޫޕަށް ސާފު ފައިދާގެ ގޮތުގައި 785 މިލިއަން ރުފިޔާ ލިބިފައިވާއިރު، އެސްޓީއޯއަށް އެކަނި ސާފު ފައިދާގެ ގޮތުގައި 763 މިލިއަން ރުފިޔާ ލިބިފައިވާކަން ފާހަގަކުރެވެއެވެ.
