ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ) ގެ ތާރީޚުގައި، އަޑުއިވުމުން މަހުރޫމްވެފައިވާ ދަރިވަރުންގެ ތެރެއިން އިންފޮމޭޝަން ޓެކްނޮލޮޖީ (އައިޓީ) ގެ ދާއިރާއިން ބެޗްލާސް ޑިގްރީ ހާސިލްކުރި ފުރަތަމަ ދަރިވަރުގެ ޝަރަފު އިސްމާއިލް ރާހިލް ހޯދައިފިއެވެ.
ސްޓޭޓް އިލެކްޓްރިކް ކޮމްޕެނީ (ސްޓެލްކޯ) ގައި ވަޒީފާ އަދާކުރަމުންދާ ރާހިލް ހޯދި މި ތާރީޚީ ކާމިޔާބީއާ ގުޅިގެން އެ ކުންފުނިން ވަނީ އޭނާއަށް ވަރަށް ހޫނު މަރުހަބާއެއް ކިޔާފައެވެ. ސްޓެލްކޯއިން ހާމަކުރި ގޮތުގައި، ރާހިލް މި ހޯދި ކާމިޔާބީއަކީ މުޅި ކުންފުނި ފަޚުރުވެރިވާ ފަދަ ނަމޫނާ ކާމިޔާބީއެކެވެ.
ރާހިލްގެ މި ކާމިޔާބީއާއެކު އޭނާ ސާބިތުކޮށްދީފައިވަނީ ނުކުޅެދުންތެރިކަމަކީ ކާމިޔާބީއަށް އޮތް ހުރަހެއް ނޫން ކަމެވެ. އަދި ވަރުގަދަ އަޒުމަކާއި ހިތްވަރަކާއެކު މަސައްކަތް ކޮށްފިނަމަ، ކޮންމެ އިންސާނަކަށްވެސް އެމީހަކު ބޭނުންވާ ލަނޑުދަނޑިއަކަށް ވާސިލްވެވިދާނެކަން ރާހިލް ވަނީ މުޅި މުޖުތަމައަށް ދައްކައިދީފައެވެ.
ސްޓެލްކޯގެ މެނޭޖްމަންޓުން ވިދާޅުވި ގޮތުގައި، ރާހިލްގެ މި ކާމިޔާބީއަކީ ތައުލީމީ ދާއިރާގައި ކުރިއަށްދާން ބޭނުންވާ، ޚާއްޞަ އެހީއަށް ބޭނުންވާ އެތައް ދަރިވަރުންނަކަށް ލިބިގެންދާނެ ވަރަށް ބޮޑު ހިތްވަރެކެވެ. ރާހިލް ދައްކައިދިން ސާބިތުކަމާއި ހިތްވަރަށްޓަކައި ކުންފުނީގެ މެނޭޖްމަންޓާއި އެންމެހައި މުވައްޒަފުންގެ ނަމުގައި އޭނާއަށް ވަނީ އިޚްލާޞްތެރި މަރުހަބާއެއް ދަންނަވާފައެވެ.
އަޅުގަނޑުމެންގެ މުވައްޒަފު އިސްމާއިލް ރާހިލް ހޯދި ތާރީޚީ ކާމިޔާބީއަށްޓަކައި ފަޚުރުވެރިކަމާއެކު މަރުހަބާ ދަންނަވަން. ރާހިލް އަކީ ދިވެހިރާއްޖޭގެ ޤައުމީ ޔުނިވަރސިޓީގެ ތާރީޚުގައިވެސް، އަޑުއިވުމުން މަހުރޫމްވެފައިވާ ދަރިވަރުންގެ ތެރެއިން އިންފޮމޭޝަން ޓެކްނޮލޮޖީގެ ދާއިރާއިން ބެޗްލާސް… pic.twitter.com/JkgMVICqNx
— STELCO (@STELCOMALDIVES) May 1, 2026
މިއީ ރާއްޖޭގެ މަތީ ތައުލީމުގެ ތާރީޚުގައިވެސް ފާހަގަކޮށްލެވޭ މުހިންމު ކުރިއެރުމެކެވެ. ރާހިލް ފަދަ ހިތްވަރުގަދަ ޒުވާނުން މުޖުތަމައުގެ މުހިންމު ދާއިރާތަކުން ތައުލީމު ހާސިލްކޮށް، ގައުމީ ޚިދުމަތަށް ނުކުތުމަކީ ރާއްޖޭގެ ތަރައްޤީއަށް ލިބޭ ވަރަށް ބޮޑު ބާރެކެވެ
